Mir ist ein grvͤssen

Froͤit v́ch ivng vnd alt·
Mir ist ein grvͤssen
worden von der svͤssen
vnd ist doch min not noch vnverslissen·
wan minv́ pfêder
ich tumber ellênder·
an gesůche noch mv̊s lenger wissen·
das ich eines nit dar ab erloͤsen mag·
sech aber ich die stunde·
das mir von ir mvnde·
wurt ein kv́ssen wol wer ich enbissen·
Minne minne hilf mir werben vmbe tag
al min not mir hêrter nie gelag·

Ich han versêtzet
das mich froͤiden letzet
sinne hertz vnd da bi můt ze pfande
das hat dv́ gůte
so frllich in hůte·
das ich eines nie von ir gewande·
het ich alles gůtes einen malter sak·
so vil ist des schaden
vf dv́ pfant geladen·
das ich kurze frist da mit benande·
Minne minne hilf mir werben vmbe tag
al min not mir hêrter nie gelag·^{[WS 1]}

Wil ich verdieben^{[WS 2]}
min hertz ab der lieben
dar zv̊ mich dekeine fv̊ge nútzet·
so gar in strike·
hant ir ǒgen blike·
sinne hertz vnd da bi můt beslútzet·
secht alsust al durch das iar stêt min beiag·
wil ir mundes roͤte
helsen mir vs noͤte·
so bin ich mit froͤiden vnder stútzet·
Minne minne hilf mir werben vmbe tag
al min not mir hêrter nie gelag·^{[WS 3]}

Anmerkungen (Wikisource)

1. Vorlage: Minne minne ⁊c̾·
2. Vorlage: ver dieben.
3. Vorlage: Minne minne.