Mir iſt ein grvͤſſen

Mir iſt ein grvͤſſen
woꝛden von der ſvͤſſen
vnd iſt doch min not noch vnverſliſſen·
wan minv́ pfêder
ich tumber ellênder·
an geſůche noch mv̊s lenger wiſſen·
das ich eines nit dar ab erloͤſen mag·
ſech aber ich die ſtunde·
das mir von ir mvnde·
wurt ein kv́ſſen wol wer ich enbiſſen·
Minne minne hilf mir werben vmbe tag
al min not mir hêrter nie gelag·

Ich han verſêtzet
das mich froͤiden letzet
ſinne hertz vn̄ da bi můt ze pfande
das hat dv́ gůte
ſo frllich in hůte·
das ich eines nie von ir gewande·
het ich alles gůtes einen malter ſak·
ſo vil iſt des ſchaden
vf dv́ pfant geladen·
das ich kurze friſt da mit benande·
Minne minne hilf mir werben vmbe tag
al min not mir hêrter nie gelag·^{[WS 1]}

Wil ich verdieben^{[WS 2]}
min hertz ab der lieben
dar zv̊ mich dekeine fv̊ge nútzet·
ſo gar in ſtrike·
hant ir ǒgen blike·
ſinne hertz vn̄ da bi můt beſlútzet·
ſecht alſuſt al durch das iar ſtêt min beiag·
wil ir mundes roͤte
helſen mir vs noͤte·
ſo bin ich mit froͤiden vnder ſtútzet·
Minne mīne hilf mir werben vmbe tag
al min not mir hêrter nie gelag·^{[WS 3]}

Anmerkungen (Wikisource)

1. Vorlage: Minne minne ⁊c̾·
2. Vorlage: ver dieben.
3. Vorlage: Minne mīne.