Minne gebútet mir das ich singe

Minne gebútet mir das ich singe·
vnd wil niht das mich iemer verdriesse·
nv han ich von ir werden trost noch gedinge·
vnd das ich mines sanges iht geniesse·
si wil dc ich iemer diene vf einen tag·
da noch min dienst ie vil cleine wag·
vnd al min stete niht gehelfen mac·
nv were min reht moͤht ich das ichs liesse·

Es stet mir niht so ine mac es niht lâssen·
das ich das herze von ir niemer bekere·
es ist ein not das ich mich niht kann mâssen·
ine mīne si dú mich da hasset sere·
vnd iemer tv̊n swies doch dar vmbe mir ergat·
min grossú stete mich des niht erlat·
vnd es mich leider cleine veruat·
ist es leit doh diene ich ir iemer mere·

Iemer mere wil ich ir dienen mit stête·
vnd weis doch wol das ich sin niemer lon gewinne·
es wer an mir ein sin ob ich da bete·
da ich lones mich versehe von der minne·
lones han ich noh vil cleinen wan·
ich diene ie dar da es mich kleine kan veruan·
nv lîesse ich es gerne moͤhte ich es lan·
es wellent dur das niht von ir mine sinne·

Mine sinne wellent dur das niht von ir scheiden·
swie si mich bi ir niht wil lan beliben·
sin enkan mir doch das niemer geleiden·
ich endiene ir gerne vnd dur si allen gv̊ten wiben·
lide ich dar vnder not das ist an mir niht schin·
dú not ist dú meiste wnne min·
si sol ir zorn dar vmbe lassen sin·
wan si enkan mich niemer von ir vertriben·