Minne gebútet mir das ich ſinge

Minne gebútet mir das ich ſinge·
vn̄ wil niht das mich iemer verdrieſſe·
nv han ich von ir werden troſt noch gedinge·
vn̄ das ich mines ſanges iht genieſſe·
ſi wil dc ich iemer diene vf einen tag·
da noch min dienſt ie vil cleine wag·
vn̄ al min ſtete niht gehelfen mac·
nv were min reht moͤht ich das ichs lieſſe·

Es ſtet mir niht ſo ine mac es niht lâſſen·
das ich das herze von ir niemer bekere·
es iſt ein not das ich mich niht kann mâſſen·
ine mīne ſi dú mich da haſſet ſere·
vn̄ iemer tv̊n ſwies doch dar vmbe mir ergat·
min groſſú ſtete mich des niht erlat·
vn̄ es mich leider cleine veruat·
iſt es leit doh diene ich ir iemer mere·

Jemer mere wil ich ir dienen mit ſtête·
vn̄ weiſ doch wol das ich ſin niemer lon gewinne·
es wer an mir ein ſin ob ich da bete·
da ich loneſ mich verſehe von der minne·
lones han ich noh vil cleinen wan·
ich diene ie dar da es mich kleine kan veruan·
nv lîeſſe ich es gerne moͤhte ich es lan·
es wellent dur das niht von ir mine ſinne·

Mine ſinne wellent dur das niht von ir ſcheiden·
ſwie ſi mich bi ir niht wil lan beliben·
ſin enkan mir doch das niemer geleiden·
ich endiene ir gerne vn̄ dur ſi allē gv̊ten wiben·
lide ich dar vnder not das iſt an mir niht ſchin·
dú not iſt dú meiſte wnne min·
ſi ſol ir zoꝛn dar vmbe laſſen ſin·
wan ſi enkan mich niemer vō ir vertriben·