Min trurekliches klagen
[412v]
MIn trurekliches klagen·
ist dc mich versneit·
minne owe·
sol aber ich nv trâgen·
dis grosse herzeleit·
iemer me·
dc an mir begat·
der minne rat·
nein ich
wil mih
vil wol entladen·
von disem schaden·
die not
der tot
ê von mir iage·
ê dc ich trage·
...
min leit als vnendelich[WS 1]·
reht als ein swan·
der wiszen kan·
dc in an·
kvmt sin tot· dem singe ich gelich·
ach miner wunnebernder rebe·
nimt ieman wunder wes ich lebe·
ia min stetú zv̊uersiht·
troͤstet mich vnd anders niht·
er mag wol von noten klagen·
der den schilt mv̊s eine tragen·
so ist dc not vber not·
wirt getragen gegen im der schilt·
ob si sich scheiden vngespilt·
ach dc ist ein lebender tot·
nv lat sie zesamen komen·
lihte wirt ein spil genomen·
dc froͤide vber froͤide birt·
owe so tůt in dar nach·
aber ein langes truren schach·
swenne vrlob genomen wirt·
minne ist ir geselle·
swer ir dienen welle·
húte svͤze morgen svr·
lieb ist leides nah gebur·
ach minne dv hast mir gegeben·
nach liebem wane ein strenges leben·
sol ich ane die frowen min·
doh din schiltgeverte sin·
swer eht ie gespilte·
vnder minnen schilte·
der lide v́bel vnd gv̊t·
alse noh lieb nah leide tůt·
vns zalten·
die alten·
von der senden not·
wie sich maniger bot·
in den grimmen tot·
swenne in div minne vberwant·
Nv lere·
mich here·
minne wiltv dc ich
dich·
vnd dinen schilt gar wunneklich·
dinen frúnden tv̊ bekant·
nv hera her·
wer des ger·
dc er werde ein dienstman·
werder minne vf hohen lon·
den lâsse ich hie
wissen wie·
gab vnd geben kan·
minne ir zeichen vnd ir don·
nv nemen war dis ist der schilt·
darvnder manger hat gespilt·
vf rotem velde ein nakent kint·
dc ist gekroͤnet vnd ist blint
von golde ein strale in einer hant·
vnd in der andern ist ein brant·
dc kint hat vf den rant gesprenget·
zwene fluge nah snellem fluge·
der schilt ist vs vnd vs gespenget
an dem zeichen vnd an dem zuge·
habt ir vernomen·
wie fúr si komen·
dú wort vnd ir materie gar·
schilt vnd kint
dc ist ein wint·
nv nemet der glose war·
weke vf minne·
spehe sinne·
tv̊ din reht dvr dc din her
dich erkenne·
schv́s vnd brenne·
vnd sich wer sich din erwer·
vúr war so kvmt amor geflǒgen·
der bringet vakeln vnd bogen·
sin strale vert dvr ganze want·
dar nach so wirfet er den brant·
so kvmt ein vúr vnd ein gelvst
balde vnder minnegernde brvst·
swc der beget oder swas er tribet·
dc ist alles kintlich spil·
dvrh dc man in so kintlich schribet·
er hat kindescher tv́ke vil·
die krone er treit·
mit werdekeit·
der mangen kv́nig betwungen hat·
a wicha wich·
wie stark wie rich·
er vberkvmt dc er bestat·
ir svlt schowen·
lieblich vrowen·
vnd lat úch her wider sehen·
kvmt al stille·
zwein ein[WS 2] wille·
ach so ist sin schvs geschen·
schone minne schone·
tobe niht mit der krone·
dv bist in ir lande·
tobe niht mit den brande·
dv hast nv zemale·
zwei mit einer strale·
gewunt in dime strike·
von ir ǒgenblike·
swa brvst kvmt zebruste·
da schinet von geluste
din vúr an die straze·
vnd brennest ane maze·
ich mv̊s eht dine blintheit klagen·
swa man siht einen swachen zagen
hoher minne solt beiagen·
blint vnd blos wc ie din spil·
dc merke swer dc merken wil·
spreche ich mer des wer zevil·
wúnschen vnd gedenken
ist din gevider·
dc kanst dv gelenken
hohe vnd nider·
wer moͤht dir entwenken·
dv flúgest her dv flúgest wider·
dinen schilt la schǒwen·
sin velt ist rot·
als man dvrh die frǒwen·
kvmt in die not·
einer lit verhǒwen·
der ander lidet snellen tot·
swer den schilt wil uͤben·
den[WS 3] sol niht betruͤben·
ob in das kint mit der krone·
twinge dc er volge schone·
dem done·
den vns paris vber se
brahte von den kriechen·
an die minnesiechen·
do die kriechen gewunnen troie·
swer da trůg der minnen boie·
des kroie[WS 4]·
wc niht denne ach vnd we·