Min trurekliches klagē
[412v]
MIn trurekliches klagē·
iſt dc mich v̾ſneit·
mīne owe·
ſol ab̾ ich nv trâgen·
diſ groſſe h̾zeleit·
iemer me·
dc an mir begat·
der mīne rat·
nein ich
wil mih
vil wol entladen·
vō diſem ſchadē·
die not
d̾ tot
ê vō mir iage·
ê dc ich trage·
...
min leit als vnendelich[WS 1]·
reht als ein ſwan·
d̾ wiſzen kan·
dc in an·
kvmt ſin tot· dē ſinge ich gelich·
ach miner wūneb̾nd̾ rebe·
nimt iemā wūd̾ wes ich lebe·
ia min ſtetú zv̊u̾ſiht·
troͤſtet mich vn̄ anders niht·
er mag wol vō notē klagē·
d̾ dē ſchilt mv̊s eine tragē·
ſo iſt dc not vb̾ not·
wirt getragē gegē im d̾ ſchilt·
ob ſi ſich ſcheidē vngeſpilt·
ach dc iſt ein lebend̾ tot·
nv lat ſie zeſamē komē·
lihte wirt ein ſpil genomē·
dc froͤide vb̾ froͤide birt·
owe ſo tůt in dar nach·
ab̾ ein langes trurē ſchach·
ſwēne vrlob genomē wirt·
mīne iſt ir geſelle·
ſw̾ ir dienē welle·
húte ſvͤze moꝛgē ſvr·
lieb iſt leides nah gebur·
ach mīne dv haſt mir gegebē·
nach liebē wane ein ſtrēgeſ lebē·
ſol ich ane die frowē min·
doh din ſchiltgeverte ſin·
ſw̾ eht ie geſpilte·
vnd̾ mīnen ſchilte·
d̾ lide v́bel vn̄ gv̊t·
alſe noh lieb nah leide tůt·
vns zaltē·
die altē·
vō d̾ ſendē not·
wie ſich maniger bot·
in dē grimmē tot·
ſwēne in div mīne vb̾want·
Nv lere·
mich h̾e·
mīne wiltv dc ich
dich·
vn̄ dinē ſchilt gar wūneklich·
dinē frúndē tv̊ bekant·
nv hera her·
wer deſ ger·
dc er w̾de ein dienſtmā·
w̾der mīne vf hohē lon·
dē lâſſe ich hie
wiſſē wie·
gab vn̄ gebē kan·
mīne ir zeichen vn̄ ir don·
nv nemē war diſ iſt d̾ ſchilt·
darvnd̾ māger hat geſpilt·
vf rotē velde ein nakent kint·
dc iſt gekroͤnet vn̄ iſt blint
vō golde ein ſtrale ī ein̾ hant·
vn̄ in d̾ and̾n iſt ein bꝛant·
dc kīt hat vf den rant geſpꝛenget·
zwene fluge nah ſnellē fluge·
d̾ ſchilt iſt vſ vn̄ vſ geſpenget
an dē zeichē vn̄ an dē zuge·
habt ir v̾nomē·
wie fúr ſi komē·
dú woꝛt vn̄ ir mat̾ie gar·
ſchilt vn̄ kint
dc iſt eī wint·
nv nemet d̾ gloſe war·
weke vf mīne·
ſpehe ſīne·
tv̊ din reht dvr dc din her
dich erkēne·
ſchv́s vn̄ bꝛēne·
vn̄ ſich wer ſich din erwer·
vúr war ſo kvmt amoꝛ geflǒgē·
d̾ bꝛinget vakeln vn̄ bogen·
ſin ſtrale vert dvr ganze want·
dar nach ſo wirfet er dē bꝛant·
ſo kvmt ein vúr vn̄ ein gelvſt
balde vnd̾ mīnegernde bꝛvſt·
ſwc der beget od̾ ſwaſ er tribet·
dc iſt alles kintlich ſpil·
dvrh dc mā in ſo kintlich ſchꝛibet·
er hat kīdeſcher tv́ke vil·
die krone er treit·
mit w̾dekeit·
d̾ māgē kv́nig betwūgē hat·
a wicha wich·
wie ſtark wie rich·
er vberkvmt dc er beſtat·
ir ſvlt ſchowē·
lieblich vꝛowē·
vn̄ lat úch her wid̾ ſehen·
kvmt al ſtille·
zwein ein[WS 2] wille·
ach ſo iſt ſin ſchvs geſchen·
ſchone mīne ſchone·
tobe niht mit d̾ krone·
dv biſt ī ir lande·
tobe niht mit dē bꝛande·
dv haſt nv zemale·
zwei mit ein̾ ſtrale·
gewūt in dime ſtrike·
vō ir ǒgēblike·
ſwa bꝛvſt kvmt zebꝛuſte·
da ſchinet vō geluſte
dī vúr an die ſtraze·
vn̄ bꝛēneſt ane maze·
ich mv̊s eht dine blintheit klagē·
ſwa mā ſiht einē ſwachē zagē
hoh̾ mīne ſolt beiagē·
blint vn̄ blos wc ie din ſpil·
dc m̾ke ſw̾ dc m̾kē wil·
ſpꝛeche ich mer des wer zevil·
wúnſchē vn̄ gedenkē
iſt din gevid̾·
dc kanſt dv gelenken
hohe vn̄ nider·
w̾ moͤht dir entwenkē·
dv flúgeſt her dv flúgeſt wid̾·
dinē ſchilt la ſchǒwē·
ſin velt iſt rot·
als mā dvrh die frǒwen·
kvmt in die not·
ein̾ lit v̾hǒwen·
d̾ and̾ lidet ſnellen tot·
ſw̾ dē ſchilt wil uͤbē·
den[WS 3] ſol niht betruͤben·
ob in das kint mit der krone·
twīge dc er volge ſchone·
dē done·
dē vns paris vber ſe
bꝛahte vō dē kriechē·
an die mīneſiechē·
do die kriechē gewūnen troie·
ſw̾ da trůg der mīnē boie·
des kroie[WS 4]·
wc niht dēne ach vn̄ we·