Maniger wunne bilde

Maniger wunne bilde·
geschepfet hat·
meie mit der kúnfte sin·
seht wie dc gevilde·
gebluͤmet stat·
es git pfellelvarwen schin·
da bi bekleidet sich der walt·
der hat der lǒbe ein wunder·
svͤssen sanc darvnder·
vil manicvalt·
singent wol dv́ vogelin·
Svmer zit·
froͤide git·
vnd wunneklichen rat·
hei wc er nv froͤiden hat·
der liebe nahe lit·

Meie truren krenket·
vf richen lon·
dient im berg vnd tal·
vs der bluͤte klenket·
vil svͤssen don·
manic wilde nahtegal·
blawen viol gruͤnen kle·
die gelwen zitelosen·
vnd rote rosen·
vil schone als e·
siht man springen vber al·
Sumer zit·
froͤide git·
vnd wunneklichen rat·
hei wc er nv froͤiden hat·
der liebe nahe lit·^{[WS 1]}

Wol im der nv minnet·
ein selic wib·
bi so maniger wunne gůt·
froͤiden vil gewinnet·
sin werder lip·
liep nv wol den herzen tůt·
swa dien ǒgen liehten schin·
die blvͤnden bǒme bringent·
vnd den oren singent·
dú vogellin·
da froͤit minne mannes mv̊t·
Svmer zit·
froͤide git·
vnd wunneklichen rat·
hei wc er nv froͤiden hat·
der liebe nahe lit·^{[WS 2]}

Anmerkungen (Wikisource)

1. Vorlage: Sum̾ ⁊c̾·
2. Vorlage: Sum̾ ⁊c̾·