Lange swigen des hat ich gedaht

Lange swigen des hat ich gedaht·
nv wil ich singen aber als ê·
dar zv̊ hant mih gv̊te lúte braht·
die mvgen mir noch gebieten me·
ich sol in singen vnd sagen·
vnde swes si gern dc sol ich tůn so svln si minen kvmber klagen·

Hoͤret wunder wie mir si geschehen·
von min selbes arebeit·
ein wib dv wil mih niht an sehen·
die braht ich in ir werdekeit·
dc ir der mv̊t so hohe stat·
ia enweis si niht swenne ich min singen lâsse dc ir werdekeit zergat·

Ja herre was si nv fluͤche liden sol·
swenne ich nv lâsse minen sanc·
alle die si nv lobent dc weis ich wol·
die scheltent danne ân minen danc·
tvsent herze wurden fro·
von ir genaden des si lihte engeltent scheide ich mich von ir also·

Do dvhte mich des dc si were gv̊t·
wer was ir besser do danne ich·
dest ein ende swas si mir getv̊t·
so mac si wol verwênen sich·
nimt si mich von dirre not·
ir leben hat mines lebens ere· sterbet si mich so ist si tot·

Sol ich in ir dienste werden alt·
die wile ivnget si niht vil·
so ist min har vil lihte also gestalt·
dc si einen ivngen danne wil·
so helfe got her ivnger man·
so rechet mich vnd gêt ir alten hvt mit svmer laten an·