Lange ſwigē deſ hat ich gedaht
[135v]
Lange ſwigē deſ hat ich gedaht·
nv wil ich ſingen aber als ê·
dar zv̊ hant mih gv̊te lúte bꝛaht·
die mvgen mir noch gebieten me·
ich ſol in ſingē vn̄ ſagē·
vnde ſwes ſi gern dc ſol ich tůn ſo ſvln ſi minen kvmber klagen·
Hoͤꝛet wūder wie mir ſi geſchehē·
vō min ſelbes arebeit·
ein wib dv wil mih niht an ſehen·
die bꝛaht ich in ir w̾dekeit·
dc ir der mv̊t ſo hohe ſtat·
ia enweis ſi niht ſwēne ich min ſingen lâſſe dc ir werdekeit zergat·
Ia h̾re was ſi nv fluͤche liden ſol·
ſwēne ich nv lâſſe minen ſanc·
alle die ſi nv lobent dc weis ich wol·
die ſcheltent danne ân minen danc·
tvſent h̾ze wurden fro·
vō ir genaden deſ ſi lihte engeltent ſcheide ich mich vō ir alſo·
Do dvhte mich deſ dc ſi were gv̊t·
wer waſ ir beſſer do danne ich·
deſt ein ende ſwas ſi mir getv̊t·
ſo mac ſi wol v̾wênen ſich·
nimt ſi mich vō dirre not·
ir leben hat mines lebens ere· ſterbet ſi mich ſo iſt ſi tot·
Sol ich in ir dienſte w̾den alt·
die wile ivnget ſi niht vil·
ſo iſt min har vil lihte alſo geſtalt·
dc ſi einen ivngen danne wil·
ſo helfe got her ivnger man·
ſo rechet mich vn̄ gêt ir alten hvt mit ſvmer laten an·