Jarlanc valwet manig anger

Jarlanc valwet manig anger·
vnd ǒch vil der liehten heiden·
ǒwe vnd ǒch der gruͤne walt·
winter borget in niht langer·
er ist grime vnd vnbescheiden·
sost sin twingen manicvalt·
doch verklagte ich wol dú leit·
vnd die winterlichen swere·
troste mich dú seldenbere·
der min dienest ist bereit·

Die ich in dem herzen minne·
vnd in rehter liebe meine·
dú ist gar gewaltig min·
sich hant alle mine sinne·
gar vereinet dur si eine·
doch mv̊s ich ir froͤmde sin·
wafen senelicher nôt·
wie sol min herze dc erliden·
mv̊s ich si iht langer miden·
so bin ich an froͤiden tôt·

Ich han iamer nach der gv̊ten·
stêteklichen alle stunde·
dur dc si ist alse gůt·
ich wolde ir genaden mv̊ten·
dc si mir noch froͤide gvnde·
mit ir willen ob sis tůt·
al min trost lit gar an ir·
nieman sol mir dc verkeren·
ob mih iamert nach der heren·
die min herze meinet mir·

Sit min herze mir si meinet·
da von mv̊s ǒch ich si minnen·
herzeklichen iemer me·
wem sin herze ein lieb so minnet·
der mag wol herzelieb gewinnen·
herzeliebe tůt niht we·
wan als ichs bescheiden sol·
est ein minnegernder smerze·
wa gegen liebe gert dc herze·
da froͤit lieb gedinge wol·

Selig wib genade sende·
mir sit ich genade mv̊te·
hilf genadenriches wib·
herzen trut mir sorge wende·
min vil liebes lieb dc gůte·
vngenade mir vertrib·
din genade tůt mich fro·
wilt dv frowe dich erbarmen·
vber mich vil senden armen·
so stêt min gemvͤte hô·