In dem tal vf dreiet sich

IN dem tal vf dreiet sich·
so rilich gedoͤne·
von den vogelin·
dc es ob den bergen erklinget·
vnd dú heide ist wunneklich·
von den blv̊men schoͤne·
da birget sich in·
lerke sos in lúften gesinget
wúnschent· dc vns nah so liehtem meien·
komen súle richú herbest wunne·
sit die lenge kvnne·
fro nieman gesin·
ane spise pfaffen noch leien·

Grifent her min herze wil·
sich nah ir zer stozen·
der ich han gelebet·
her mit dienste so lange·
mir ist niht ein kindes spil·
selkes herzen boren·
in leide mir swebet^{[WS 1]}·
min gemvͤte von dem getwange·
wer min herze ein adamas so herte·
es moͤhte sich von sender not zer klieben·
als es gen der lieben·
zepine da strebet^{[WS 2]}·
in weis wers so lange ie generte·

Schoͤnes lieb gar minneklich·
slús vfdin gemvͤte·
la liebe dar in·
dú mir dich ze amîen erwerbe·
des sol minne twingen dich·
vnd sol dvr ir guͤte·
mir teilen den pin·
dc ich niht alleine verderbe·
schoͤnes lieb min svnder trut dvr vv̊ge·
rihte mich in eben holdem sinne·
frowe diner minne·
so tůn ich in·
kunt minnekliche dienste genv̊ge·

Anmerkungen (Wikisource)

1. Vorlage: ſwebt.
2. Vorlage: ſtrebt.