Ich wil aber singen
[92r]
Ich wil aber singen·
doch moͤht ich von svs getanen dingen·
bas sv̊ften vnd clagen·
owe grosser leide
mich froͤit niht der anger noch dú heide·
noch singen[WS 1] vnd sagen·
mich froͤwet niht der tamber noch dú gige·
hoͤre ich harpfen vnd rotten an den mv̊t ich sige·
von der reinen der ich dike nige·
mv̊s ich die swere tragen·
Ich han leit vnd vngemach·
sit ich si von erst gesach·
ach vnd aber ach·
Dv́ vil svͤsse reine·
ahtet vf mich senden kleine·
dem tv̊t si wol gelich·
da begat si sv́nde·
swie vil ich des mit gesange kúnde·
doch lebt si froͤmdeklich·
mir tv̊t we dc si mich senden smahet·
vnd dú liebe minen sang niht in ir ore enpfahet·
da von kvmber mir in herzen gahet·
des bin ich sorgen rich·
Ich han leit vnd vngemach·
sit ich si von erst gesach·
ach vnd aber ach·[WS 2]
Grůs von rotem mvnde·
der vergat mich leider zaller stunde·
des mv̊s ich froͤide lan·
lieblich ǒgenblike·
die vergant mih zwirent also dike·
wie sol min leit zergan·
mich froͤit niht dú svnne noh der mane·
nieman kan mich troͤsten wan dú reine valsches ane·
wil dú minnekliche wolgetane·
so mag ich fro wol bestan·
Ich han leit vnd vngemach·
sit ich si von erst gesach·
ach vnd aber ach·[WS 3]
Ich habe ir gesvngen
vnd gesprochen vil· mit lobender zvngen·
dc beste dc ich kan·
wil si des vergessen·
so hat vngemvͤte mich besessen·
trut minne sich dar an·
wig dc dv́ liebe ste geliche·
ald dc si mir vs gedanke entwiche·
iamer tv̊t vil dike sorgen riche·
mih froͤidelosen man·
Ich han leit vnd vngemach·
sit ich si von erst gesach·
ach vnd aber ach·[WS 4]
Swer mir gv̊tes gvnne·
vnd der minen kvmber merken kvnne·
der spreche ir iemer wol·
der si lopt mit worten
der hat mine gvnst an allen orten·
dc ich verdiene sol·
ich bin ir gebvnden gar fúr eigen·
dem si gv̊tes gan der ist gescheiden von den veigen·
wolde si genade an mir erzeigen·
so wurde ich froͤiden vol·
Ich han leit vnd vngemach·
sit ich si von erst gesach·
ach vnd aber ach·[WS 5]