Ich solt aber singen von den rosen rot

Ich solt aber singen von den rosen rot·
vnd des meien guͤte·
der mit siner blvͤte· zieret wilden hag·
nv wil mich betwingen des ein ander not·
dc ich mit gedoͤne·
liehte blv̊men schoͤne· niht geprisen mag·
ich mv̊s strafen die verschamten richen tugendelosen·
die sich in der schande klosen· hant getan·
ich enwil niht kosen·
húre von den rosen vf dem^{[WS 1]} gruͤnen plan·

Vs dem besten wine scharpfer essich wirt·
swenne er sich verkeret·
dv́ bischaft mich leret· dc ich wirde svr·
swie gv̊t ich erschine min gemvͤte girt
doch in argem willen·
herren kan ich villen· sam der wilde schur·
bǒme velwet vnd si betruͤbet ir genúhte·
io wise ich von eren frúhte kargen man·
zv̊ der schanden^{[WS 2]} súhte·
sit ich miner zúhte niht geniessen kan·

Gernder man die kleinen gabe schelte niht·
die der milte biete·
der vil grosser miete· niht zegeben hat·
swer zerbrichet einen spiegel der gesiht·
in de stúkelinen·
ganze bilde schinen svs wirt vollú tat·
in der kleinen gabe erkant die von dem gůte spaltet·
des ein notig herre waltet· ganzen schin·
meslich gelt behaltet·
dc durh ere valtet sich in stúkelin·

Anmerkungen (Wikisource)

1. Vorlage: den.
2. Vorlage: ſchande.