Ich sihe den morgen· sternen glesten

Ich sihe den morgen· sternen glesten·
rief ein wahter vberal·
swer nach sines herzen wal·
hie minne tǒgen· svnder lǒgen·
vf dem sal· der scheide sich enzit·
von liebe dc im nahe lit·
vil vnuerborgen· vf den esten·
manic wildú nahtegal·
lute doͤnet ane zal·
den tac vermelden· in den welden·
kan ir schal· da warne ich frúnde bi·
dvr dc in gah von minnen si·
e den palas erlúhte·
dc froͤlich morgen rot·
ein scheiden mich von liebe dúhte·
weger denne ein grimmeklicher tot·
dis merke ein ritter· dem zebitter·
al sin froͤide werden mag·
ob er langer vf den tac·
wil spulchen hinne· svͤsser minne·
swer gepflag der masse an liebe nie·
dem misselanc an minnen ie·

Ein frowe schoͤne· von der stimme·
sere vnd innekliche erschrac·
do si liebe nahe lac·
ir iamer wunde· gar zegrunde·
tiefe wag· dú reine sprach owe·
nv mv̊s ich truren aber als ê·
der minne loͤne· sint ze grimme·
wol ich dc erkennen mac·
wan ir froͤide ist mir ein slac·
sit ich dur dine· glanzen schine·
leider tac· vermiden sol min lieb·
dv were ie heiles dieb·
der min gelúke stôrte·
mit vnselden kvmberlich·
swenne ich den morgen nennen horte·
so verbarg min hohgemvͤte sich·
geselle reine· dem ich eine·
ganzer trúwe schuldic bin·
wache vnd ile von mir hin·
der tac vf dringet· vnd bringet·
leiden sin· der mich an liebe wunt·
wil machen vf des herzen grunt·

Dem ritter kvͤne· sorge entsperret·
wart von iamer inneklich·
zv̊ der schonen twanc er sich^{[WS 1]}·
er sprach herze· bitter smerze·
leret mich· dc ich von sender not·
gelige an hoher wunne tot·
min froͤide gruͤne· wirt gederret·
mid ich vnd lasse dich·
herze troͤsterinne sprich·
wc sol min werden· vf der erden·
frowe ob ich zelange schúhen mv̊s·
dich vnd dinen werden grůs·
dv solt mir des gelǒben·
dc ich kvme din enbir·
vns wil der morgen froͤiden rǒben·
lege mich trut ein wenig naher dir·
an dinen armen· las erwarmen·
mich vil reine selig wib·
vnd twing ǒch dinen lip·
zv̊ minem herzen senden smerzen·
dv vertrip· vnd gib ein kv́ssen mir·
da mit scheide ich mich von dir·

Anmerkungen (Wikisource)

1. Vorlage: er ſich twanc.