Ich sas vf einer gruͤne

Ich sas vf einer gruͤne·
vnd gedahte an manger hande ding·
wie ich die werlt behielte vnd ǒch gegen gotte icht wurde ling
ich konde niht erdenken dc·
dc mir iht doͤhte vf solher hande ger·
ich wart bloͤde vnd kuͤne·
von gedanken der ich vil verschriet·
von der werlte dúgge· min kintheit mir die witze riet·
dc nieman vf der eren satz
kvmt ane gv̊t· deswart min herze swere·
ich strafte frǒwen eren·
ich sprach ir sit ein kranke magt· lat ir schaz verkeren
si súfte vnd sprach dú tvmmer
schaz d hat mich vber wegen·
wan mag min wol mit schatze pflegen·
schaz ane tvgent dest gegen mir ein kvmmer·

Naturen kraft erschinet·
wol an dem vogel volita·
kein ser noch kein swere noh kein leit kvmt da·
also dc er lide not dc er die krone vor allen vogeln treit·
der tot in niht pinet
als vns dv́ schrift sagt offenbar·
sin lip vor tode ist froͤmde· die vedern werdent blv̊tigvar·
als die gotheit· wart nie mat·
dú menscheit starb· an krist dvrh vnser leit·
sit gotheit menscheit fůrte·
dú menscheit starb so dc der tot die gotheit nie berůrte·
dc wc ein michel wunder
dc vatter svn geist wc eine strike·
vnd doch niht wan einer leide iamer spike·
der tǒgen schos tůt die valschen vnder·