Ich horte ein merlikin wol singe

Ich horte ein merlikin wol singen·
dc mich dvhte der svmer wolte entstan·
ich wene es alder werlte froͤide sol bringen·
wan mir einem mich entriege min wan·
swie min frǒwe wil so sol es mir ergan·
der ich bin zallen ziten vndertan·
ich wande ieman so hete missetan·
sv̊cht er genade im solte gelingen·
dc mv̊s leider an mir einen zergan·

Wie sol ich minen dienst so zâfen·
den ich lange mit trúwen han getan·
ich bin leider sere wunt ane wasen·
dc habent mir ir schoͤnú ǒgen getan·
dc ich niemerme geheilen kan·
es enwelle der ich bin vndertan·
wie sol ein so verdorben man·
ich wene an ir ist genade entslaffen·
dc ich ir leider niht erweken kan·

Ich wil iemer wesen holt minem mv̊te·
dc er ie so nach ir minne geranc·
Hete ich fvnden deheine so gv̊te·
Danach kerte ich gerne minen gedanc·
si schv̊f dc ich mich froͤiden vnderwant·
die ich han mir zeiner frǒwen erkant·
ich was wilde swie vil ich doch gesanc
ir schoͤnú ǒgen· dc waren die růte
damitte si mich von erst betwanc·

Ich wil iemer mir genaden beliben·
si mv̊s sv́nde ane schulde an mir began·
si kan mich niemer anders von ir vertriben·
ich enwelle haben gedingen vnd wan·
dc dú trúwe hoher solte gan·
danne vnstete der ich gůtes verban·
swa man weste einen valschaften man·
der solte vnwerden allen gv̊ten wiben·
so mohte man in an ir prise gestan·

Ich wil niemer dvr minen kvmber vermiden·
ich ensinge des alleine swies mir ergat·
vnd wil gerne solhe not iemer liden·
div von minnen mir so nahe gat·
sit min lib an dem zwiuel stat·
dc min leider niemer kan werden rat·
ane div mich so betwungen hat·
sol nu min froͤide zergan von der pliden·
dc ist ir sv́nde vnd gros missetat·

Vs minen ǒgen dc ist ein wunder·
von dem herzen dc wasser mir gat·
als ich gedenke dc mich her vnder·
al min kvmber vnd min dienest niht veruat·
den ie dehein man gewan oder hat·
sit mir min gemvͤte alse sere stat·
betwungen dc si mine sele niht lat·
des mv̊s ich von der werlte besvnder
vnd von ir hvlden scheiden dvr die getat·