Ich bin holt einer frowen ich weis vil wol vmbe wc (Mit aufgelösten Abbreviaturen)

Ich bin holt einer frowen ich weis vil wol vmbe wc·
sit ich ir begvnde dienen si geviel mir ie bc vnd ie bc·
e lieber vnd ie lieber so ist si zallen ziten mir·
ie schoͤner vnd ie schoͤner vil wol gevallet si mir·
si ist selic zallen eren der besten tugende pfligt ir lip·
sturbe ich nah ir minne vnd wurde ich danne lebende so wurbe ich aber vmbe das wib·

So we den merkeren die habent min úbel gedaht·
si habent mich ane schulde in eine grosse rede braht·
si wenent mir in leiden so si so runent vnder in·
nv wissen al geliche dc ich sin frúndinne bin·
ane nahe bi gelegen des han ich weis got niht getan·
stechent si vs ir ǒgen mir ratent mine sinne an deheinen andern man·

Mir erwelten minú ǒgen einen kindenschen man·
dc nident ander frowen ich han in anders niht getan·
wan ob ich han gedienet dc ich dú liebste bin·
daran wil ich keren min herze vnd al den sin·
swelhú sinen willen hiebi vor hat getan·
verlos si in von schulden der wil ich nv niht wîssen sihe ich si vnfroͤlichen stan·

Ich sach botten des svmers dc waren blůmen also rot·
weistv schoͤne frowe was dir ein ritter enbot·
verholne sinen dienest im wart liebers nie niet·
im truret sin herze sit er nv ivngest von dir schiet·
nv hoͤhe im sin gemvͤte gegen dirre svmerzit·
fro wirt er niemer ê er an dinem arme so rehte gvͤtliche gelit·