Ich bin der der lieben liebú mere singe
[72v]
Ich bin der der lieben liebú mere singet·
vnd der lieb ze liebe dike vnsanfte bringet·
swc ich sol dc leist ich in mit trúwen gar·
bringe ich lieb ze liebe so ist beiden· lieb al dar·
singe aber ich ein scheiden· des nement[WS 1] si vil kleine war·
Wahter wie mag dich so kvrzer wile erlangen·
sit ich han den lieben man zv̊ mir gevangen·
der mir an dem arme vnd in dem herzen lit·
vnd mir fúr senende sorge spilnde froͤide git·
wahter bekennest dv des manens schin fúr tages zit·
Frowe ich kan iv zehulden niht wol gesingen·
got der lasse iv beiden iemer wol gelingen·
ê doch klage ich den edelen werden svͤssen man·
mir ist leit sol ich im helfen niht von dan·
wol im der bi liebe leides sich behuͤten kan·
Sit din rat mit trúwen vert wahter gv̊t·
so gang von der wer her vmbe an dise hv̊t·
ia getorste ich dir min leit niht wol geklagen ê·
owe liebes mannes vnd mines herzen[WS 2] we·
wahter nim min golt vnd hilt im hin swies mir erge·