Iarlanc treit

Iarlanc treit·
heide bꝛeit·
manige not vn̄ arebeit·
ſi was ane leit·
do ſi froͤide erſtreit·
vn̄ roſen willeklichē bar·
gruͤne kleit·
vn̄ weit·
ir der liehte ſvmer ſneit·
ane kvnt̾feit·
die ſint nv v̾ſeit·
ir vō ſchedelicher noͤte gar·
ſi mv̊s hoꝛdē· leideſ oꝛdē·
woꝛdē· iſt ir húbeſcheit·
vnbereit·
wā ſi ſneit·
rife durh die w̾dekeit·
dc man in v̾meit·
vn̄ maniger ſtreit·
nah ir blv̊men wūneklich gevar·

Herze min·
vogellin·
vn̄ glanze roſen fin·
la nv dulten^{[WS 1]} pin·
vn̄ klage din·
ſelbes trurē michel vn̄ ſtark·
tvgende ſchꝛin·
vmbe den rin·
ſtet voꝛ dir beſloſſē· in
des toꝛre vn̄ ſwin·
kv́nig ſalatin·
gab dvrh ere wilent manige mark·
nv wil ſchāde· in maniger hande·
lande· volle komē ſin·
kúnigin·
eren ſchin·
blichet^{[WS 2]} als ein baldegin·
dc v̾nezet win·
tvgēde wid̾grin·
woꝛdē iſt nv manic h̾re karc·

Schanden gran·
vn̄ ir zan·
miſſezierent richen man·
dē ich wirde erban·
vn̄ im lobes niht gan·
dvr dc ie ſin h̾ze tvgende v̾ſwůr·
eren van·
vō im dan·
ſnvrret wîſſer danne ein ſwan·
er iſt milte wan·
dv́ vō im entran·
vn̄ zv̊ dē tvgentrichē fůr·
im zerate· gar zeſpate·
krate· des gelúkes han·
ſit im kan·
haften an·
git der^{[WS 3]} ſich nie tvgēde v̾ſan·
ſit im zerran·
da dv́ ſelde ſpan·
ſiner eweklichen wúnne ſnv̊r·

Anmerkungen (Wikisource)

1. Vorlage: dultent.
2. Vorlage: bliket.
3. Vorlage: er.