Heide vnd anger

Heide vnd anger·
went niht langer
blv̊men tragen·
nv stet blos der gruͤne walt·
kalte winde·
went geswinde·
hin veriagen·
leider lǒbes vngezalt·
rife vnd ǒch der kalde sne·
selwent beide·
gruͤne heide·
sumer kleide·
túnt si leide·
vnd den kleinen vogelin we·
Sv̊sse gruͤsse sint so gůt·
swa liep tǒgen·
vnder ougen
bliken tůt·

Ach ich tumber grosser kvmber·
tůt mir leit·
da von bin ich vngemv̊t·^{[WS 1]}
ach wie we dc selbe tůt·
wc klage ich der blv̊men schin·
sit ich worgen·
mv̊s in sorgen·
manigen morgen·
vnverborgen·
von der lieben frowen min·
Suͤsse gruͤsse sint so gůt·
swa liep tǒgen·
vnder ougen
bliken tůt·^{[WS 2]}

Sit die mine
starken pine·
merent sich·
vnd min froͤide swinden wil·
vnd dú reine·
harte kleine·
troͤstet mich·
dc ist mir ein hertes spil·
we wie sol ich fro bestan·
sit dú here·
mir niht lere·
git vúr sere·
swar ich kere·
da von mv̊s ich kvmber han·
Suͤsse gruͤsse sint so gůt·
swa liep tǒgen·
vnder ougen
bliken tůt·^{[WS 3]}

Wie mich wundert·
sehe ich hvndert
tusent wib·
mir geviele enkeine bc·
danne dú gůte
wol gemv̊te·
schoͤnen lip
hat dú liebe wissent dc·
ich gesach nie reiner fruht·
si kan machen·
froͤlich lachen·
trvren swachen·
bi den sachen·
hat min frowe wiblich zuht·
Suͤsse gruͤsse sint so gůt·
swa liep tǒgen·
vnder ougen
bliken tůt·^{[WS 4]}
Ungewinne·
mir dú minne·
dike git·
da von habe ich vngewin·
swc ich singe·
vngelinge·^{[WS 5]}
nimet mir min froͤide hin·
minne gib mir suͤssen trost·
la die reinen·
valsches einen·
lieplich meinen
mir bescheinen·
so wird ich der not erlost·
Sv̊sse gruͤsse sint so gůt·
swa liep tǒgen·
vnder ougen
bliken tůt·^{[WS 6]}

Anmerkungen (Wikisource)

1. Drei Zeilen fehlen.
2. Vorlage: Suͤſſe gruͤſſe·
3. Vorlage: Suͤſſe gruͤſſe· ⁊c̾·
4. Vorlage: Suͤſſe gruͤſ·
5. Eine Zeile fehlt.
6. Vorlage: Sv̊ſſe ⁊c̾·