Heide velt berg vnd tal

Heide velt berg vnd tal·
sint gezieret vber al·
von der bǒme^{[WS 1]} blvͤte·
stant si wol bekleit·
Hoͤrent wie dú nahtegal·
svͤsse doͤnet ane zal·
wan des meien guͤte·
machet si gemeit·
si kan singen lute als ê·
dc^{[WS 2]} dú heide erkrachet·
manic blv̊me dvr den kle·
wol betǒwet ane we·
gegen der svnne lachet·
gar an vnderscheit·
Meien blv̊t· mannes lip·
froͤlich tv̊t· liebes wib·
troͤstet^{[WS 3]} sinen mv̊t·

Meie wunnekliche zit·
vf dem liehten velde wit·
mit den blv̊men teilen·
aber schone wil·
swer nv liebe nahe lit·
heý wie der an allen strit·
kan mit froͤiden heilen·
sender wunden vil·
lieb von leide manigvalt·
sich bi liebe loͤset·
so gelǒbet stet der walt·
vnd dú heide wol gestalt·
schone lit geroͤset·
in ir wunne spil·
Meien blv̊t· mannes lip·
froͤlich tv̊t· liebes wib·
troͤstet sinen mv̊t·^{[WS 4]}

Wib sint gv̊t svͤs vnd wis·
wib hant reiner tvgende pris·
nach ir minne tǒgen·
mannes herze qvilt·
wib sint heiles wunschelris·
aller froͤiden paradis·
vs ir liehten ǒgen
blvͤiet vnd spilt·
swen ir berndes minnezwi·
niht ergeilen kunne·
der ge sterben vnd si·
lebender froͤide vf erde fri·
wib hant alle wunne
mit troste vber zilt·
Meien blůt· mannes lip·
froͤlich tv̊t· liebes wib·
troͤstet sinen mv̊t·^{[WS 5]}

Anmerkungen (Wikisource)

1. Vorlage: bǒmē.
2. Vorlage: dc dc.
3. Vorlage: troͤſtēt.
4. Vorlage: Meien blv̊t· ⁊c̾·
5. Vorlage: Meiē blůt·