Got schepher aller dingen

Got schepher aller dingen·
din werdes lob kein zvnge mag
vol sprechen noh volsingen·
swie aller kreatúre kraft
in diner hende stat·
din sint die himel trone·
din ist dú naht din ist der tag·
din ist der svnne schone·
nah diner hohen meisterschaft
der himel vmbe gat·
die sternen sint dir gar bekant·
mit ir bezeichenvnge·
vier element in diner hant
sint eigenlich betwungen·
luft wasser vúr erteriche·
swc in den vieren wonend ist·
dc schv̊f vil meisterliche·
dins edeln wortes hoher list·
in siben tagen vrist·

Got schepfer al der welte·
ih̓s din einbornes kint·
bant sich zegrossem gelte·
die bůze^{[WS 1]} er svnder missetat·
vil gar vf sich gelůt·
er wolt die armen^{[WS 2]} loͤsen·
die in der helle lagen blint·
von túuels reten boͤsen·
dane half golt silber noh kein wat·
wan sin vil reines blv̊t·
von ivda wart er sicherlich
verkǒfet vnd verraten·
gevangen liez er fuͤren sich
gebvnden vúr pýlaten·
dvrh vuͤze vnd ǒch durh hende·
vnd dur sin siten wart da wunt
got ane missewende·
des manig sele sa zestvnt·
kam vs der helle grunt·

Heiliger geist erhoͤre·
mich armen ich wil bitten dich·
min sv́nde dv verftoͤre·
ich fúrht ich got vnmere si·
von sv́nden vn gezalt·
erlúhter aller herzen·
mit diner lere erlúhte mich·
dc mich der helle smerzen·
an minem ende machen vri·
din gabe sibenvalt·
gib vorhte mir vnd rehte kraft·
rat vnd rehte milte·
sit ich mit sv́nden bin behaft·
noh mv̊t ich drîer schilte·
der erste ist rehte witze·
der ander schilt ist rehtú kvnst·
kein vient ich entsitze^{[WS 3]}·
wirt mir der dritte reht vernvnst·
so hab ich gotes gvnst·

Anmerkungen (Wikisource)

1. Vorlage: die.
2. Vorlage: arme.
3. Vorlage: entzitze.