Got ſchepher aller dingē

Got ſchepher aller dingē·
din w̾des lob kein zvnge mag
vol ſpꝛechē noh volſingen·
ſwie aller kreatúre kraft
in din̾ hende ſtat·
din ſint die himel trone·
din iſt dú naht din iſt d̾ tag·
din iſt d̾ ſvnne ſchone·
nah diner hohē meiſt̾ſchaft
d̾ himel vmbe gat·
die ſt̾nen ſint dir gar bekant·
mit ir bezeichenvnge·
vier element in diner hant
ſint eigenlich betwūgē·
luft waſſer vúr erteriche·
ſwc in den vierē wonēd iſt·
dc ſchv̊f vil meiſt̾liche·
dins edeln woꝛteſ hoh̾ liſt·
in ſibē tagē vꝛiſt·

Got ſchepfer al d̾ welte·
ih̓s din einboꝛnes kīt·
bant ſich zegroſſē gelte·
die bůze^{[WS 1]} er ſvnd̾ miſſetat·
vil gar vf ſich gelůt·
er wolt die armen^{[WS 2]} loͤſen·
die in d̾ helle lagē blint·
vō túuels retē boͤſen·
dane half golt ſilb̾ noh kein wat·
wā ſin vil reines blv̊t·
vō ivda wart er ſich̾lich
v̾kǒfet vn̄ v̾raten·
gevangē liez er fuͤren ſich
gebvndē vúr pýlaten·
dvrh vuͤze vn̄ ǒch durh hēde·
vn̄ dur ſin ſitē wart da wūt
got ane miſſewende·
des māig ſele ſa zeſtvnt·
kam vs d̾ helle grunt·

Heiliger geiſt erhoͤꝛe·
mich armē ich wil bittē dich·
mī ſv́nde dv v̾ftoͤꝛe·
ich fúrht ich got vnm̾e ſi·
vō ſv́ndē vn gezalt·
erlúht̾ all̾ h̾zen·
mit din̾ lere erlúhte mich·
dc mich d̾ helle ſm̾zē·
an minē ende machē vꝛi·
din gabe ſibēvalt·
gib voꝛhte mir vn̄ rehte kraft·
rat vn̄ rehte milte·
ſit ich mit ſv́ndē bin behaft·
noh mv̊t ich dꝛîer ſchilte·
d̾ erſte iſt rehte witze·
d̾ and̾ ſchilt iſt rehtú kvnſt·
kein vient ich entſitze^{[WS 3]}·
wirt mir d̾ dꝛitte reht v̾nvnſt·
ſo hab ich goteſ gvnſt·

Anmerkungen (Wikisource)

1. Vorlage: die.
2. Vorlage: arme.
3. Vorlage: entzitze.