Got der aller wunder

Got der aller wunder·
wunder wundert·
der hat svnderlich besvnder·
wunder vs gesvndert·
dc vor allen wunder·
michel wunder ist·
svnder sv́nden schimel
wunderere·
got ob allen himeln himel·
dv bist wunderbere·
mitten oben vnd vnder·
vmbe vnd durh dinen list·
mit listen aller liste· list verlist·
do sich got reine in menschen fleis fleiset·
do er mit listen sich vierzeg wochen friste·
so grosser wunder liste· ich nie gefreiset·
dc ein meit gebere·
sv́nden fri
ein kint dc ir vater were·
svͤzú meit marie
gottes flammes zvnder
dv mit wunder bist·

Der den zirggel tihte·
sinewel vmbe·
vnd die linie nah die rihte^{[WS 1]}·
svnder alle krumbe·
mit volleklicher maze·
zweier wendeschaft·
wol sin zikel ellú
ding besluͤsset·
beide himel vnd die helle·
dc im niht enpflússet·
ganz in rehter saze
volleklich sin kraft·
gezirkelt hat sich selbe vmbe alle kere·
dc niht ist vsen im des man gedenke·
sin linie dur den zirkel reht vns lere·
der wise got den vns den vater schenke·
vnd den svn gewaltig·
kvnde senden·
vns ein got des name driualtig
ist der in zwein wenden
zweier ê gelaze
selbe ist winkelhaft·

Pruͤbet herren pruͤbet·
wer verdirbet
nah dem lútzel ǒgen truͤbet·
vnd in kerge erstirbet·
sin lob mit im ersiget·
als das reht gebot·
swar ein milter herre
libes wandelt·
kiagendes lob der helle werre·
wirt vmbe in gemandelt·
dc er schone vf stiget·
vs von aller not·
wer hilfet im wes name ist hie vergessen·
des man nah tode selten wol gedenket·
es růchen die sin erbe hant besessen·
ob er wirt in der helle grunt gesenket·
swer nv lob versvmet·
riche lebende·
swenne ers hie mit schanden rumet·
klage nach zegebende
wirt im dort vil selten
so ist er vollen tot·

Anmerkungen (Wikisource)

1. Vorlage: derhte.