Geometria deutsch
Aus der geometrey etliche nuczparliche stück dy hernach geschriben sten. Zum ersten behend ein gerecht Winckel maß zu machen. So mach zwen risz vber ein ander an gesezt wie du wilt vnd wo die risz vber ein ander geen da setz ein .e. Darnach setz ein zirckel mit einen ort auff den punckt .e. vnd zeuch in auf als weit du wilt vnd mach auf yde lini ein punckt Das sei die puchstaben .a.b.c. daz alles ein weiten sei. Darnach mach ein lini vom a. in daz b. vnd vom b. in daz .c. So hastu ein gerecht winckelmasz des ein exempel hie stet
Item darnach setz den zirckel mit einem ort auff den punckt .d. vnd mach ein runden risz durch das a.b. vnd wo der rund risz vber den risz .c.d. get da setz ein .e. Darnach schau wo der selb rund risz vber den runden risz .d.b.h. get da setz ein .f. des gleichen auff der anderen seiten da setz ein g. Darnach leg ein richtscheit auff den punckt .f. vnd auff das .e. vnd mach ein risz durch dy punckt gar hin ausz pisz an den runden risz .d.a.c.g. da setz ein k. Des gleichen auf der anderen seyten da setz ein .h. Darnach setz den zirckel auff den punckt .k. vnd mach ein risz vber die lini .d.e.c. vnd wo das vber ein ander get da setz ein .i. Darnach mach ein risz vom .i. in daz .k. vom .k. in das .b. vom .b. in daz a. vom .a. in das .h. vom .h. in das .i. So hast du ein gerecht fünfeck des do ein exempel stet Dor ausz kumpt das gerecht fünff ort.
Nvn wer ein syben ort behend aufteilen wil der reisz ein gantz gerunden risz vnd setz ein .e. in das centrum Darnach mach ein ris von .e. pisz zu dem c. Alsz weit von e. pisz zu dem .c. ist So weit sol von dem .a. pisz zu dem .b. sein schlecht vber nit der rundung nach vnd wo die zwen risz vber ein ander gen da setz ein .d. des ein exempel wie hernach stet.
Darnach setz ein zirckel auf daz centrum .e. vnd du in auff pisz in den punckt .d. die selbig weit tayl aussen vmher der werden siben vnd mach von einem punckt zu dem andren ein risz. So hastu ein gerecht siben eck des ein exempel
Der do wil ein gerecht acht ecke machen So mach ein gerechte firung mit den puchstaben verzaychnet .a.b.c d. vnd setz in dy mit ein .e. Vnd setz ein zirckell mit einem ort in daz .e. vnd thu in auf in das .a. die selben weiten mach von dem .a. gegen dem .b. ein punckt da setz ein .f. des gleichen von dem .b. gegem .a. da setz ein .g. vom .a. gegen dem .c. da setz ein .h. vom .c. gegem .a. da setz ein .i. vom .c. gegem .d. da setz ein .k. vom .d. gegem .c. da setz ein .l. vom .d. gegen dem .b. da setz ein .m. vom .b. gegen .d. da setz ein .n. Darnach zeüch ein lini vom .f. in daz m. vom .n. in das .k. vom .l. daz .h. vom .i. in das .g. des ein figur hernach verzeichnet ist.
Hernach so einer ein gerunden risz scheitreicht machen wil daz der scheit gerecht risz vnd daz gerund ein leng sey so mach drey gerunde neben einander vnd tail daz erst rund in siben gleiche teil mit den puchstaben verzeichnet h.a.b.c.d.e.f.g. Darnach alsz weit vom .h. in das .a. ist da setz hindersich ein punckt da setz ein .i. Darnach alsz weit von dem .i. pisz zu dem .k. ist Gleich so lang ist der runden risz einer in seiner rundung der drey neben ein ander sten des ein figur hernach gemacht stet.
Ein punckt zu vinden der ab gethan ist vnd nit west wo der zirckel gestanden ist zu einem gepogen risz. So thu im also ich setz das sey der gepogen risz a.b. Nach zwen punckt auf den ris wie du wilt an geferd mit den puchstaben .c.d. setz den zirckell in das .c. vnnd thu in auff in das .d. mach ein risz des gleichen setz den zirckel in das .d. mach ein risz von dem .c. wo die zwen risz vber ein ander gen da setz oben ein .e vnd vntenn ein .f. also mach geleich ein solche figur neben der wie weit du dar von wilt mit den puchstaben verzeichnet .g.h.i.k. Darnach mach ein risz durch das .e. vnd .f. vnd des geleichen durch das i. vnnd .k. wo die zwen risz vnten vber ein ander gen da setz ein .l. in dem selben punckt ist der zirckel gestanden des ein figur hernach gemacht stet.
Der do machenn wil ein firung vnd ein driangel daz die firung vnd der driangel itlichs als vil in im helt als daz ander. So mach ein driangel daz ist ein .a.b.c. tail vom .c. pisz zu dem .b. in dren gleiche teil das ist .d.e. Darnach mach ain fierung ausz dem .c.e. wirt .f.g. So helt die fierung gleich als vil in als der driangel das ein exempel hernach gemacht stet.
Merck so einer ein stech helm ausz der geometry machen wil der mach ein fierung mit den puchstaben verzaichnet .a.b.c.d. Darnach tail vom .a. zum .c. inn fünff gleiche tayl mit den puchstabenn .g.h.i.k. Darnach tayl vom .b. pisz zum .d. in drey gleiche teyl mit den puchstaben .e.f. Darnach teil vom .a. zum .b. in acht gleiche tayl. Des gleich vom .e. zum .d. vnd reisz risz von einem tayl zu dem anderen Darnach schaw auf die risz vnd züg wie sie dar innen steen des ein exempel hernach stet.
So einer ein schilt mit der geometry machen wil der mach ein risz mit den puchstaben .a.b.c. vnd das daz .b. in der mit sey. Darnach mach ein risz von dem .b. schlecht vntersich ab vnd als weit vom .b. zum .a. oder .c. ist. So weit mach ein punckt auf der lini vntersich ab da mach ein .e. vnd reisz ein risz vberzwerch daz dyselb lini gleich der obern sey. Darnach nym die weyten vber ort vom .e. zum .a. die selben weiten setz daz .b. vnnd mach ein punckt da mach ein .g. Darnach ein h. in die mit. darnach nym ein weit .a.b. vnd setz mit einem ort auf daz .h. vnd mach ein runden risz vom .f. zum .d. ein exempel hernach stet.
