Gelebt ich noch die lieben zit (Mit originalen Lettern)

Gelebt ich noch die lieben zit·
dc ich dc lant ſolte beſchowē·
darinne al min froͤide lit·
nv lange an einer ſchonē frǒwen·
ſo geſehe min lip·
niem̾ weder man noch wib·
getrurē noh gewinnē rowen·
mich dvhte nv vil maniges gv̊t·
da vō ie ſwere was min mv̊t·

Ich wande ir e· vil verre ſin·
da ich nv vil nahe were·
alrerſte hat dc h̾ze min·
vō der froͤmde groſſe ſwere·
es tůt wol ſin trúwe ſchin·
wer ich iender vmb dē rin·
ſo frieſche ich lihte ein ander mere·
des ich doch leider nie v̾nam·
ſit dc ich vb̾ die berge kam·

Ich ſage ir nv vil lange zit·
wie ſere ſi min h̾ze twinget·
als vngelǒbic iſt ir nit·
dc ſi der zwiuel darvs bꝛinget·
dc ſi hat als ſelhen kip·
den ze rehte ein ſelig wib·
niemer rehte vol bꝛinget·
dc ſi dem vngelônet lat·
der ſi voꝛ al der w̾lte hat·

Nieman ſol mir dc v̾ſtan·
ſine moͤhte mich voꝛ eime iaere·
vō ſoꝛgē wol erloͤſet han·
ob es der ſchonē wille were·
ǒch half mir ſere ein lieber wan·
ſwāne ſi min ǒgen ſan·
dc wc ein froͤide fúr die ſwere·
alleine wil ſis gelǒben niet·
dc ſi min ǒge gerne ſiet·