Frowe min got gebe dir gv̊ten morgen
[244r]
Frowe min got gebe dir gv̊ten morgen·
gv̊ten tag vil froͤide riche naht·
got behvͤte dich vor al den sorgen·
da von din lip werde in truren braht·
bist dv fro so bin ich hohes mv̊tes·
mir ist zehohem mv̊te niht so gv̊tes·
so das dv sist herzeklichen fro·
Dv hast ein lieb vor allen dingen·
dc ist mir als herzen lieb so dir·
nah des hulden wil ich iemer ringen·
nie niht wart so rehte liebes mir·
so din lip des bringe ich dich wol inne·
frowe mines herzen kv́niginne·
tůt mir din lip wol so bist dv gůt[WS 1]·
Liebe frowe liebest aller wibe·
din lip ist in dem herzen min·
so ist din reines herze in sinem libe·
welhem sol es danne naher sin·
des kan ich vor liebe niht bescheiden·
es ist vns so rehte beiden·
dc sin[WS 2] vnser[WS 3] tweders nie vergas·
Lieb vor allem liebe so ist frǒwe·
din vil svͤsser minneklicher lip·
an dem selben libe[WS 4] ich min lieb schowe·
dc bist du vil reine selig wib·
min lip treit din herze dc es leret·
tugende vil des sit ir beide geeret·
wol mich des dc ich úch dienen sol·
Gv̊t wib ich wil dienen ritterliche
dir· vf den vil herzelieben wan·
dc ich noh kome in das himelriche·
dc dir da nie mannes lip wart in verlan·
dc ist din herze din tugende frowe·
wahsent inne vs der gvͤte tǒwe·
la mich dar ich tv̊n dir sanfte da·