Frǒwe ſchoͤne frǒwe reine

Frǒwe ſchoͤne frǒwe reine·
frowe ſelig frǒwe gůt·
ich wene ivch^{[WS 1]} dú minne kleīne·
mvͤt des ſit ir hohgemv̊t·
wirt iv mīne twingē kvnt·
úwer kleine vil rôter mvnt·
lernet ſúften an d̾ ſtvnt·

Herre ſagt mir wc iſt mīne·
iſt eſ wib oder iſt es man·
des en wart ich noh nie inne·
ſagt an wie iſt es getan·
das ſult ir mir kúndē gar·
wie es ſi vn̄ wie es var·
dc ich mich voꝛ im bewar·

Frǒwe mīne iſt ſo gewaltig·
dc ir dienent ellú lant·
ir gewalt iſt manigvaltig·
ich tv̊n iv ir ſitte bekant·
ſi iſt úbel ſi iſt gv̊t·
wol vn̄ we ſi beide tůt·
ſeht alſo iſt ſi gemv̊t·

Herre kan dú mīne ſwēden·
trurē vn̄ ǒch ſendú leit·
hohgemv̊te ī h̾ze ſenden·
fuͤgen zuht vn̄ w̾dekeit·
hat ſi alleſ deſ gewalt·
als ich iv han voꝛ gezalt·
ſo iſt ir ſelde menicvalt·

Frǒwe ich wil iv von ir mere·
ſagē ir lon iſt wunneklich·
ſi git froͤide vn̄ git ere·
ſi tůt hoher tvgenden rich·
ǒgen wunnē h̾zen ſpil·
git ſi ſwem ſi lonen wil·
dar zv̊ hoher ſelden vil·

Herre wie ſol ich v̾ſchuldē·
ir lop vn̄ ir habedanc·
ſol ich kvmber da vō dulden·
da iſt min lip zv̊ gar zekranc·
leideſ mag ich niht getragen·
wie ſol ich ir lon beiagē·
h̾re dc ſvlt ir mir ſagē·

Frǒwe da ſolt dv mich meinē
h̾zeklichē als ich dich·
vnſer zweien ſo v̾einen·
dc wir beide ſin ein ich·
wiſ dv min ſo bin ich din·
h̾re des mag niht geſin·
ſit ir úwer ich bin min·

Anmerkungen (Wikisource)

1. Vorlage: iv.