Er tore vil tvmbe des lib si gehas
[240r]
ER tore vil tvmbe des lib si gehas·
den merkeren dvr ir arges spehen
ir merken ir huͤten dc troͤstet noch bas·
danne an dem tvmben dc tǒbe vber sehen·
swer gv̊ten wiben ir gvͤtlichen mv̊t·
wol kan gemerken des merken ist gv̊t·
swer des niht merket der ist tǒb vnd vnfrůt·
Vnvalschliches merken seht dc ist ein pris·
mannen vnd wiben der vil hohe stat
von gvͤtlichen wirt man eren wis·
vnwerdes merken dc in nide ergat·
vnd hůte in nide den zwein trage ich has·
von rehten hv̊ten wil ich sprechen dc·
das al der werlte zimt niht dinges bas·
Dú hv̊te an den wiben dú tv̊t mich so vro·
dc ich in wúnsche dc si eht sin behv̊t·
mit hv̊te beslossen vil sere vnd also·
dc in dú hv̊te behvͤte den mv̊t·
mit [240v] rehter guͤte vor valschlichen sitte·
dc si niender wenken von gvͤte einen trit·
der hůte in allen ich wúnsche vnd bit·
Min frǒwe kan hvͤten ir eren so wol·
dc si in ir hv̊te so werlichen stat·
si wert sich vnprises zerehte als si sol·
niwan des einen des si an mir begat·
si wil niht merken dc ich von ir trage·
leitliche swere nv vil manige tage·
vnd dc ich ringe mit we tv̊nder klage·
Vnde kvnde si merken si mvͤse mir iehen·
dc ir min dienest ist stete ane wank·
nv mac si des tǒgen in min herze sehen·
wie gegen ir hvlden spilt al min gedanc·
si mac dc schǒwen ob sis merken wil·
svͤssen gedingen da bi iamers vil·
der zweier schanze ich gegen ir hvlden spil·