Ein wiser man hat einen svn
[213v]
EIn wiser man hat einen svn·
der was im lieb als manigem ist·
den wolt er lêren rehte tvn·
vnd sprach also min svn dv bist·
mir lieb an allen valschen list·
bin ich dir sam dv selbe dir· so volge mir zedirre frist·
die wile dv lebest es ist dir gůt·
ob dich ein froͤmder ziehen sol· dv weist niht wie er ist gemv̊t·
Svn minne minneklichen got·
so kan dir niemer missegan·
er hilfet dir vs aller not·
nv sich der werlte goͤchel an·
wie si ir volger triegen kan·
vnd wc ir lon zeivngest si dc solt dv sinnekliche entstan·
si git zelone sv́nden lot·
der ir ir willen volgen wil·der ist libes vnd der sele tot·
Svn merke wie das kerzen lieht·
die wile es brinnet swindet gar·
gelǒbe dc dir sam geschiht·
von tage ze tage ich sage dir war·
des nim in dinen sinnen war·
vnd rihte hie din leben so· dc dort din sele wol gevar·
swie hoh an gv̊te wirt din name·
dir volget sin niht wan alse vil ein linin tv̊ch fúr dine schame·
Svn gib im der dir hat gegeben·
vnd aller gabe hat gewalt·
er git dir noch ein iemer leben·
vnd ander gabe manic valt·
me danne lǒbes habe der walt·
wiltv nv kǒfen disen hort in sinen hvlden dich hie halt·
vnd sende gv̊te botten fúr·
die dir dort wol behaben rv̂me dc der wirt verhabe die túr·
Svn ellú wisheit ist ein wiht·
dú herze sin ertrahten kan·
hat er ze gote minne niht·
vnd siht in niht mit vorhten an·
es sprach hie vor ein wiser man·
dc dirre welte wisheit si vor gotte ein torheit svnder wan·
davon so rihte dinen sin·
dc dv in sinen hulden lebest· vnd lâ dich aller dinge an in·
Svn geistlich leben in eren habe·
dc ist dir gv̊t vnd ist ein sin·
des willen kvm dvrh nieman abe·
bring in ze diner grůben hin·
dc wirt an selden din gewin·
enrůche wie die pfaffen leben dv solt doch dienen gotte an in·
sint gv̊t ir wort ir werk si krump·
so volge dv den worten nach ir werken niht als dv bist tvmp·
Svn es was ie der leien sitte·
dc si den pfafsen truͤgen has·
da sv́ndent si sich sere mitte·
ich kan niht wissen vmbe wc·
ich wil dir raten verre bas·
dv solt in holt mit trúwen sin· vnd sprich in wol vnd tůst dv dc·
so mac din ende werden gv̊t·
vnd wirt ze lone dir beschert gotte lichame vnd sin reines blv̊t·
Svn ob dir got hie fvͤgen ein wib·
nach sînen lobe ze rehter ê·
die solt dv haben als dinen lib·
vnd fvͤge dc es also ste·
dc úwer beider wille ge·
vs einem herzen vnd drin· Was wilt dv danne wunne me·
ob dc geschiht in trúwen pflege
seiet aber dú werre ir sâmen dar· so mvͤssen scheiden sich die wege·
Svn dv solt sinneklichen tragen·
verholn din núwes vingerlin·
din tǒgen niht den tvmben sagen·
dc zwein ist reht dast zenge drin·
la dich niht vbergên den win·
den solt dv niht zehvse laden dc din vîende iht spotten din·
ahte vf die zv́ngelere niht
die zwischen frúnden werre tragen· vnd dc in ivdas wise geschiht·
Svn swer bi dir ein mêre sage·
mit worten ims niht vnderbrich·
vnd swer dir sinen kvmber klage·
in scham vber den erbarme dich·
der milte got erbarmet sich·
vber alle die erbarmic sint dien wiben allen schone sprich·
ist vnder in einv́ selden fri·
da bi sint tvsent alder me dien tvgent vnd ere wonet bi·
Svn wilt dv zieren dinen lip·
so dc er si vngefuͤge gram·
so minne vnd ere gvͤtú wib·
ir tvgent vns ie von sorgen nam·
si sint der wunne ein bernder stam·
da von wir alle sin geborn· er hat niht zuht noch rehter scham·
der dc erkennet niht an in·
er mv̊s der toren einer sin vnd het er salomones sin·
Svn si sint wunne ein berndes lieht·
an eren vnd an werdekeit·
der werlte an eren zv̊versiht·
nie wiser man dc widerstreit·
ir name der eren krone treit·
dú ist gemessen vnd geworht mit tvgenden vollig vnd breit·
genade got an vns begie·
do er im engel [214r] dort geschv̊f dc er si gab fúr engel hie·
Svn dv maht noch niht wissen wol·
was eren an den wiben lit·
ob es dir selde fuͤgen sol·
dc dv gelebst die lieben zit·
dc dir ir gvͤte froͤide git·
so kan dir niemer bas geschehen· ze dirre werlte svnder strit·
du solt in holt mit trúwen sin·
vnd sprich in wol tv̊st dc des niht so mv̊s ich mich getroͤsten din·
Svn wiltv arzenie nemen·
ich wil dich lere ein getrank·
lat dirs din selde wol gezemen·
dv wirst selten tvgenden kranc·
din leben si kurz oder lank·
lege in din hercz ein reines wib mit steter liebe svnder wank·
ist es an werdekeit verzaget·
als der triâggel eiter tůt ir wib ich guͤte es veriaget·
Sun ich sage dirs svnder wan·
des mannes herze ist vngesvnt·
dc sich niht innan reinen kan·
mit wibes libe zaller stvnt·
es wc ein tvgentlicher fvnt·
do gůter wibe wart gedaht· hat ieman sorgen sweren bvnt·
den truric mv̊t bestrichen hat
der striche wiblich gvͤte dar alsam ein tǒ sin not zergat·
Svn sit dv́ selde lit an in·
dú nie mit lobe ir zil vol mas·
so diene in gerne hastv sin·
dv lebst in eren dester bc·
got sin an selden nie vergas·
dem ir genade wirt beschert vnd er mit trúwen dienet dc·
dem stat der schilt zehalse wol
im kvmt zelône ein blanker arn da im der rieme ligen sol·
Svn dv solt wissen dc der schilt·
hat werdezeit vnd eren vil·
den ritter tugende niht bevilt·
der im zerehte volgen wil·
die warheit ich niht enhil·
er ist der werlte svnder wan ein hohgemessen froͤiden[WS 1] zil·
nimt in ze halse ein tvmber man·
der im sin reht erkennet niht da ist der schilt vnschvldig an·
Svn lat dich got geleben die zit·
dc er mit rehte wirt din dach·
wc er dir danne froͤiden git·
wiltv im baltlich volgen nach·
weist dv wie gamvret beschach·
der von des schiltes werdekeit der moͤrin in ir herze brach·
si gab im lib lant vnd gv̊t·
er git dir ǒch noch eren vil gibst dv im lip herze vnd mv̊t·
Svn wiltú gantzlich schiltes reht·
erkennen so bis wol gezogen·
getrúwe milte kv́sche vnd sleht·
so ist er niht an dir betrogen·
vnd kvmt din lop wol fúr geflogen·
wilt aber leben in frîer wal dien tvgenden allen vor verlogen·
der rede min trúwe si din pfant·
wiltu in so zehalse nemen er hienge bas an einer want·
Svn als din helm genem den strik·
ze hant bis mvͤtic vnd balt·
gedenke an reiner wibe blik·
der grůs man ie mit dienste galt·
sitze eben swende so den walt·
als dir von arte si geslaht min hant hat manigen abe gevalt·
des selben mv̊st ich mich bewegen·
gůt ritterschaft ist topel spil dú selde wil des siges pflegen·
Svn nim des gegen dir komenden war·
vnd senke schone dinen schaft·
als ob er si gemalet dar·
las an din oes mit meisterschaft·
ie bas vnd bas ruͤrte im die kraft·
ze nagelen vieren vf den schilt da sol din sper gewinnen haft·
oder da der heln gestriket ist·
dv́ zwei sint rehtú ritter mal vnd vf der brvst der beste list·
Svn wiltú zieren dine ivgent·
dc si ze hove in eren ge·
snît an dich zvht vnd reine tvgent·
ich weis niht wc dir bas an ste·
wiltú si tragen in rehter ê·
si machet dich dien werden wert vnd git dir dannoch selden me·
ich meine gv̊ter wibe segen·
der ist ein so genêmer hort in moͤhte ein lant niht wider wegen·
Svn dv solt bi dien werden sin·
vnd la ze hove dringen dich·
der man ist nach den sinnen min·
dar nach als er gesellet sich·
zerehte swig zestatten sprich·
die boͤse mere dir ze oren tragen von in dîn stete herze brich·
wiltu din ore als maniger tůt·
dien velscheleren bieten dar so wirst dv selten wol gemv̊t·
Svn dv solt diner zvngen pflegen·
dc si niht vs den angen val·
si lat dich anders vnder wegen·
der eren vnd der sinnen bar·
schús rigel fúr vnd nim ir war·
gezoͤimet [214v] rehte si din zorn· si gebe vmbe êre niht ein har·
wirt si din meister wissest dc·
si setzet dich in gotes zorn vnd dienet dir der werlte has·
Svn besser ist gemessen swir·
danne gar verhowen ane sin·
ê dc dú rede entrinne dir·
zegehes vs dem mvnde hin·
besnit si wol vf den gewin·
dc si den wisen wol behage· dc wort mac niht hin wider in·
vnd ist doch schiere fúr den mvnt·
wilt des rates volgen niht dv lebest an eren vngesvnt·
Svn dv ganc niht vngebetten·
an frúndes noch an viendes rat·
es mac den man in schande wetten·
ob er da sitzet oder stat·
da man sin hete gerne rat·
svn dv solt so niht dringen zv̊ fúr war es ist ein missetat·
kvmst aber dú dar von frúndes bette·
so beslús die schame fúr den mvnt· dc sich din zvnge iht vbertrette·
Svn hoh geburt ist an dem man·
vnd an dem wibe gar verlorn·
da wir niht tugenden kiesen an·
als in den rin geworfen korn·
swer tvgende hat derst wol geborn·
nv merke reht· was ich dir sage ich han zefrúnde mir erkorn·
den nidern bc der eren gert·
dan einen hohen svnder tugent der húre ist boͤser danne vert·
Svn wissest dc dú mâsse git·
vil eren vnd werdekeit·
die solt dv minnen ellú zit·
so wirt din lob din wirde breit·
ist dc dien wandelberen leit·
was vmbe dc der boͤsen has die biderben selten[WS 2] ie vermeit·
leb dv in tvgentlicher aht·
vnd la den kranken also leben als im von arte ist geslaht·
Svn dv solt haben vnd minnen gůt·
doch so dc es dir niht lige obe·
benimt es dir herze vnd frien mv̊t·
so stat din leben in krankem lobe·
gv̊t dc ist gitikeit ein klobe·
dem es ist lieber danne got vnd weltlich ere ich wenne er tobe·
den es also gevasset fúr·
dc er sich âne[WS 3] ir beider ê· danne er dc eine gar verkúr·
Svn so der vogel ê rehter zit·
von sinem neste fliegen wil·
sich selben er vil lihte git·
den tvmben kinden zeinem spil·
die rede ich dir gelichen wil·
nimst dv dich an des dv niht maht vol enden vnd dir ist zevil·
da mv̊st dv ligen an eren lan·
so were fúr ere besser dir vnd were es nie gevangen an·
Svn habe das dv getragen maht·
dc dir zeswere si la ligen·
swer gerne ie vber hǒbet vaht·
der mohte deste wirs gesigen·
dir ist der wîsen lop verzigen·
wiltv ze gehes mv̊tes sin ân allen rat vnd ǒch verswigen·
so kvmt dir gar dc sprich wort wol·
an mv̊te al zegeher man vil trêgen esel riten sol·
Svn dv solt selten schaffen iht·
ân diner wisen frúnde rat·
ob dir des an gelvnge niht·
dc were niht ein missetat·
swer wiser lúte lere hat·
vnd in mit willen volget nach dem gat zeselden vf sin sât·
dú mêre dike zweient sich·
da von solt dv dc beste wellen vnd volge dem dc eret dich·
Svn swer sich selben eren wil·
der nimt getrúwes rates war·
man verlúset gv̊ter rête vil·
an einem herzen tvgenden bar·
swer dienet vnd râtet dar·
da mans ze danke niht enpfat der verlúset sine wile gar·
swas frúnt frúnde geraten mac·
ern welle selbe stúren sich dc ist in einen bach ein slag·
Svn si iehent alle es brenne frú·
dc zeiner nesselen werden sol·
din ivnger mv̊t dc selbe tů·
dc kvmt dir in dem alter wol·
mit dir ich leides mich erhol·
min trost ist an dich einen kon[WS 4] din lieb min lieb in leit min dol·
got tů mich zweier sorgen bar·
dc dv iht werdest vngemv̊t vnd dc din sele iht missevar·
Svn drissec iar ein tôre gar·
der mv̊s ein tore fúrbas sin·
die wisen sprechent es si war·
es ist vil dike worden schin·
vnd ist ǒch der gelǒbe min·
gewonheit ist da schvldig an dú git dem libe solhen pin·
des er von kintheit ist gewon·
es si im schade es si im from da kvmt er ane got niht von·
[215r] Svn dv solt houeliche sitte·
in dinen sinnen lâssen pfaden·
behvͤte dich vor einem snitte·
der tůt an eren grossen schaden·
da mitte wart iv das vberladen·
der in dem snitte noch fvnden wirt der mv̊s mit im zehelle baden·
Ich meine vntrúwe vns seit dú schrift·
si si der armen sele dort vnd hie des libes ein vergift·
Svn dv solt kúscher worte sin·
vnd stetes mv̊tes tv̊st dv das·
so habe es vf die trúwe min·
dv lebest in eren deste bas·
trage niemanne nît noch langen has·
bis gegen den vienden hohgemv̊t bis frúnden niht mit dienste las·
da bi in zv́hten wol gezogen·
vnd gruͤsse da dv gruͤssen solt so hat dich selde niht betrogen·
Svn hohvart vnd gitekeit·
dú zwei sint boͤse nachgebvrn·
an den der tiefel sich versneit·
dc im sin svͤsse wart zesvr·
sin schoͤne noch swerzer danne ein sur·
in sleht noch húte vnd iemer me zehelle drvmbe ein bitter schur·
der in dem snitte fvnden wirt·
dem git in sinem hvse rǒch der selbe swarzer helle wirt·
Svn ich han lange har vernomen·
swer vber sich mit hohvart wil·
dc im sin lebe mac darzv̊ komen·
dc sich vervellet gar sin spil·
ein ieglich man hat eren vil·
der rehte in siner mâsse lebt vnd vber misset niht sin zil·
swer sich so zv́het vnd ie zo·
dc in sin fůre machet wert der wirt an eren billich ho·
Svn wil dir lieben gv̊t gemach·
so mv̊stv eren dich bewegen·
ein ivngen man ich nie gesach·
dú zwei in gelicher wage wegen·
was sol ein ivnger lip verlegen·
der vngemach niht liden kan noch sinneklich nach eren stegen·
es ist mir ane zwivel kvnt
es lǒfet selten wisú mv̊s slafender vohen in den mvnt·
Svn wissist dc verlegenheit·
ist gar dem ivngen man ein slac·
es ist dir offenlich geseit·
dc nieman ere haben mac·
noch herzeliebe svnder klak·
gar ane kvmber vnd nôt der lǒch so niht in den sak·
swer sich vor schanden wil befriden·
der mac gebergen niht den lib er mv̊s enblanden an den liden·
Svn beidú lv̊der vnd spil·
sint libes vnd der sele val·
der âne mâsse in volgen wil·
si machent breitú eigen smal·
swer lebt ân êre in frîer wal·
der wirt dien werden schiere vnwert vnd hvset in der affen tal·
swer svs verlúset sine habe·
mit disen valschen fůren zwein der lege bas in einem grabe·
Svn swen sîn sin verleitet so·
dc er vnreht im selben[WS 5] tůt·
ist der bi wîsen lúten fro·
da sol man kiesen tôren mv̊t·
dú rúwe ist nach der schulde gv̊t·
ob si von herzen rehte vert· ein vol von einer wilden stůt·
vnd v̂s gevangen wirt ê zam·
ê dc ein vngeraten lib gewinne ein herze dc sich scham·
Svn twinc des dinen frien sin·
dc dv zehvse rihtest dich·
ein teil ich vngerihtig bin·
wan tůt noch lât vn vil dvr mich·
den armen gib snit vnd brich·
mit willen diner reinen habe ob allen reten dc rate ich·
es ist dir gv̊t vnd wirt ǒch mir·
ich han mit eren her gelebt zehvs wirf ich den slegel dir·
Svn ob ich vngeruͤmet wol·
vnd ane vnfůge sprechen mac·
mit liebe ich dich bescheiden sol·
sit ich von erste hvses pflac·
da kvm ich von niht einen tac·
min vmbesetzen wisten wol wie do min wort in eren lac·
ich hate ǒch noch vil gv̊ten mv̊t
vnd willig herze wan dc mir dc alter grôssen schaden tůt·
Svn swer dc hvs wol haben wil·
der mv̊s drú ding zestúre han·
gv̊t milte zvht so lit sin spil·
er ist da bi ein froͤlih man·
ders wol dien lúten bieten kan·
so tůt sin brot dien nemenden wol vnd lachent beide einander an·
svn sint dir niht die tugende bi·
so mac der gast wol riten fúr swie gar er nas vnd mvͤde si·
Svn swer mit tvgenden hvses pfliget·
der nimt an werdekeit niht abe·
vnd also mit der mâsse wiget·
dc im gevolgen mac sin habe
vnd krvche der an einem stabe·
gote vnd der werlte wer er wert die rede ich in din herze grabe·
wil si da inne wesen niht·
als einem vogel der ê zit· von neste flúget dir geschiht·
[215v] Svn hus han ist ein werdekeit·
dú bi den hohsten eren vert·
swer si mit schonen sinnen treit·
wie wol sich der in eren nert·
dc gv̊t reineklich verzert·
dc niht ein schade geheissen mac· vnd zwen from sint dir von beschert·
gotes lon der werlte habe danc·
der dv́ zwei wol behalten kan den richet wol sin aker ganc·
Svn zwei wort erent wol den man·
der sich wil eren mit in zwein·
so dc er si behalten kan·
dc eine ist ia dc ander nein·
wie zieret golt dc edel gestein·
als tv̊nt gewerú wort den lip· er ist niht fleisch vnz vf dc bein·
dem also slipfic ist der sin·
dar er sin ia genennet hat dc er sin nein da schússet hin·
Svn flúch dc dich iht binde ein bant·
dc ist gestriket in der maht·
dc dv gebvnden bist zehant·
vor gote in krefteklicher acht·
der wirt in sine strike braht·
so dc in vinde da der tot we im dc sin ie wirt gedaht·
dc bant ist der gediente ban·
der klemmet in der helfe also dc ivdas nie die not gewan·
Svn dannoch ander kraft er treit·
den er gevasset an sin seil·
er nimet al der kristenheit·
gemeinde vnd aller selden teil·
sin wundv́ sele wirt niht heil·
kvmt er mit rehte niht der von ie groͤsser wirt der sv́nde meil·
gebet almv̊sen wirt verlorn·
vnd swc er gv̊tes mac getůn die wile in stichet dirre dorn·
Svn âchte ist ǒch ein bitter krůt·
strâsse vnd ir stige gerne mit·
si mac verleiten dir die hut·
swie gv̊t geleite man dir git·
gerihtes vber dich ist zit·
swa man dich hoͤret oder siht die wile vf dir ir beie lit·
da la dich inne niht versmiden·
dehein zvnge vnd ist der rihter gv̊t· mac vor dem tode dich befriden·
Svn ich wil dir niht mere sagen·
der mâsse ein zil gestôssen si·
dv maht sin alles niht getragen·
nim vs dien râte allen dri·
lege si dem herzen nahe bi·
ob es niht besser werden mac wirt gotes minne niemer fri·
bis warhaft zúhtic svnder wanc·
manic tvgent ir flus nimet von drin· behalt si wol habe iemer danc·
Uatter dv hast vaterlich mir·
gerâten als ein wiser man·
ich wil vil gerne volgen dir·
ob mir got siner helfe gan·
dú elliv dinc wol enden kan·
sîn vnvolmessen hohú tvgent bitte ich ǒch iemer vnd man·
dc ich im hie zedienste lebe·
also dc er mir drvmbe dort sins vater himnelriche gebe·
Uatter ich bin kint doh sihe ich wol·
dc disú werlt ein gǒggel ist·
ir froͤide erloͤschet als ein kol·
ir bestú minne wirt ein mist·
ir trost ist gar ein vngenist·
si lat ir frúnde in swacher habe des dv wol innen worden bist·
dv hast ie har gedienet ir·
nv merke was ir trugeheit zelône habe gegeben dir·
Vatter alter lib vnd mvͤde lit·
dú zwei sint niht nah voller habe·
dv wer ê snel nv ist din trit·
zenahe leider bi dem stabe·
da grvset mir von schulden abe·
ob dine schvlde manicvalt dem libe volgent hin zegrabe·
din rat ist kranc· ob dc geschiht·
des mannes wisheit ist ein wint ist er im selbem wise niht·
Uater wîsem manne schone zimt·
dc er wol tů mit steten sitten·
da bi ein tvmber bilde nimt·
dc wirt vil lihte sus vermitten·
ein gar alt man mit tvmben siten·
der niht erkennet was er ist vnd was got hat dvr in erlitten·
der ist in toren acht gemv̊t·
es ist ein lob vor allen lobe der an dem ende rehte tůt·
Uater mit vrlube wil ich dir·
min herze entsliessen vber al·
es mac sich niht verheln bi mir·
du solt fúr diner sv́nden val·
legen vf din eigen ein spital·
vnd solt dich selbe ziehen drin ich var mit dir in frier wal·
alle vnser habe svln wir dar seln·
vnd fúr der werlte trugeheit dc svͤsse himelriche weln·
Svn die rede vs dem herze din·
gesprochen hat ein reiner geist·
ich froͤwe mich in dem herzen min·
dc dv so vil von gote weist·
dins rates wil ich sin volleist·
wan da stůnt ie min wille zv̊ doch lies ichs dvr dich aller meist·
ich han gelebt nv lieben tag·
dc dv ze gotte wilt dich begeben vnd ich mit dir gebvͤssen mac·
Svn swas ich froͤiden ie gewan·
die sint [216r] bi disen froͤiden blint·
sit ich von dir vernomen han·
dc dir die froͤide vnmere sint·
ich sage dir herzeliebes kint·
wir kǒfen in der sache niht· an dinem mv̊te niht erwint·
ob wir hie vnsers zwiuel leben
vmb eines dc vns iemer wert mit froͤiden willeklichen geben·
Us ǒgen mv̊st er wangen baden·
von herzeliebe dc geschach·
der svn sprach vatter ir tůnt ú schaden·
ir volgent wibes sitten nach·
die man ie gerne weinen sach·
da hoͤret niht wan froͤide zv̊ vnd hie des libes vngemach·
ia ist es niht ein kinden spil·
der mit des libes arebeit zerehte sv́nde bússen wil·
Got herre dinv́ trinitat·
vnd ǒch din starkú goteheit·
erbarmen sol min missetat·
des man ich din erbarmekeit·
dú rehtem rúwen ist bereit·
dc dv mir stete rúwe gebest so dc mir si von schulden leit·
dc hie der lip gesv́ndet habe·
dc des iht si dú sele ein pfant dvr dine tvgent des hilf mir abe·
Got herre dv́ weist wol dc ich bin·
in sv́nden ein vertiefet man·
vnd dc min selden frîer sin·
noch stete rúwe nie gewan·
sit ich mich sv́nden erst versan·
nv bin ich in min alter komen vnd ruͤfe dine marter an·
von miner schulde manicvalt·
dc als dem schacher mir geschehe[WS 6]der speter trúwe niht engalt·
Ich bin in den wingarten braht·
dvr buwen hǒwen vnd ieten·
vnd han mich leider erst bedaht·
do ich vil frv̊ was dar gebetten·
dc ich den rat han vbertretten·
nv hat dc alter mit gewalt in sinen strik mich so gewetten·
dc ich verslafen han dv́ zit·
da von mv̊s ich zedanke nemen ein lôn den mir der meister git·
Doch tv̊t mir der gedinge wol·
den weis ich endeliche war·
bvwe ich mit trúwen als ich sol·
an lone ich deste bc gevar·
in wart gelich gelonet gar·
die frů ze tage werke[WS 7] zit vnd spate kâmen werken dar·
ich bin niht gv̊tes lones wert·
ein teil ich mich verslafen han min rúwe edoch genaden gert·
Dv bist genedig vnd gůt·
milte vnd erbarmig herre got·
dem sv́nder ober sinen mv̊t·
von sv́nden nimt dvr din gebot·
so starch ist miner sv́nden not·
es vndervar din gotlich tvgent dv́ rehter rúwe ie helfe bot·
min sele mv̊s in bůsse dagen·
das minen lip min mv̊ter ie ze disen noͤten hat getragen·
Got herre sit dú kleinen kint·
von ir geburte tages alt·
niht gar von súnden reine sint·
wie wirt es vmbe mich gestalt·
des hat din barmekeit gewalt·
min pfant stat leider vf den schaden des ich noch nie ein teil vergalt·
hilf herre ich mac vergelten niht·
din milte sol mir stúre geben der pfander grôsser bvͤsse giht·
Got dir sint ellú herzen kvnt·
ein winkel nie so enge wart·
von oben abe vnz in den grunt·
der diner wisheit si verspart·
din tvgende sint so reiner art·
dc dv den sv́nder niht vertůst gerúwet in der súnden vart·
vnd hat zebv̊sse vesten sin·
dv sihst an minem herzen wol dc ich in steten rúwen bin·
Die gabe hast dv mir gegeben·
gib mir noch diner helfe me·
la mich hie alse lange leben·
dc mir geschehe in bůsse we·
ze wol ist mir geschehen ê·
ich lie dur dine vorhte niht· noch dvr din liebe alsam owe·
sol ich dc hie gebuͤssen niht·
die wile ich an der werlte lebe wie we mir danne dort geschiht·
Maria magdalena was·
mit hǒbet sv́nden vberladen·
von starken rúwen si genas·
man sach si dine fuͤsse baden·
mit trehen[WS 8] fúr der sv́nden schaden·
dem miste iob zeteile wart in rúwen âssen in die maden·
svsannen wart mit luge vergeben·
die fvnden alle helfe an dir dv gebe in dort din iemer leben·
Din vngemessen krast lonam·
dc mv̊s man fúr ein wunder wegen·
vs eines visches wanbe nam·
da inne er wc drîe tage gelegen·
drin kinden half din gotlich segen·
dc in dv́ flamme niht entet ich bin in sv́nden gar verlegen·
dc rúwet mich vnd ist mir leit·
dv maht ǒch wunder an mir tůn so kreftic ist din barmekeit·
[216v] Din kraft ist allen kreften vor·
dv hoͤhest niderst swen dú wilt·
was half das nabuchodonosor
gewaltes hat vnd richeit vil·
von hohuart sich veruiel sin spil·
dc es zewalde wildes gie der tage ein lanc gemessen zil·
an allen vieren leider bar·
vor dinem zorne den ich han verdienet herre mich bewar·
Ich tůn hie mine bihte dir·
als ein sv́nder sol vnd mv̊s·
erzeige dine helse mir·
so dc mir werde sv́nden bv̊s·
die wile ich hant mac oder fůs·
geruͤren des wil ich dich bitten maget vnd mv̊ter dvr den grůs·
den dir von gotte der engel sprach·
ze dinem kinde sprich min wort din helfe ie starken kvmber brach·
ICh han der werlte mich begeben·
vnd sol nv als in sv́ndic man·
in rúwen vnd in bv̊sse leben·
we dc ich ie den mv̊t gewan·
der wider dich iht hat getan·
dc rúwet mich vnd ist mir leit nv la mich dine hulde han·
nah besservnge herre got·
genedekliche vber mich erge din wille vnd din gebot·
Uon herzen in vergeben si·
die mir ie har getaten leit·
min eigen lúte lâsse ich fri·
min hv̊be gelt smal vnd brei·
dc man mir bûte vnd sneit·
fúr eigen des enzien ich mich ich hans vf ein spital geleit·
es fuͤget der armen sin·
ich vnd min ein geborner svn zv̊ in vns wellen ziehen drin·
Des vater lere ein ende hat·
Der mv̊ter lere dar nach gat·