Ein wiſer man hat einē ſvn
[213v]
EIn wiſer man hat einē ſvn·
der was im lieb als manigem iſt·
den wolt er lêren rehte tvn·
vn̄ ſpꝛach alſo min ſvn dv biſt·
mir lieb an allen valſchen liſt·
bin ich dir ſam dv ſelbe dir· ſo volge mir zedirre friſt·
die wile dv lebeſt es iſt dir gůt·
ob dich ein froͤmder ziehen ſol· dv weiſt niht wie er iſt gemv̊t·
Svn mīne mīneklichē got·
ſo kan dir niemer miſſegan·
er hilfet dir vs aller not·
nv ſich der w̾lte goͤchel an·
wie ſi ir volger triegen kan·
vn̄ wc ir lon zeivngeſt ſi dc ſolt dv ſinnekliche entſtan·
ſi git zelone ſv́nden lot·
der ir ir willē volgē wil·der iſt libes vn̄ d̾ ſele tot·
Svn merke wie das kerzen lieht·
die wile es bꝛinnet ſwindet gar·
gelǒbe dc dir ſam geſchiht·
vō tage ze tage ich ſage dir war·
des nim in dinen ſinnē war·
vn̄ rihte hie din leben ſo· dc doꝛt din ſele wol gevar·
ſwie hoh an gv̊te wirt din name·
dir volget ſin niht wan alſe vil ein linin tv̊ch fúr dine ſchame·
Svn gib im der dir hat gegebē·
vn̄ all̾ gabe hat gewalt·
er git dir noch ein iemer leben·
vn̄ ander gabe manic valt·
me dāne lǒbes habe der walt·
wiltv nv kǒfen diſen hoꝛt in ſinē hvlden dich hie halt·
vn̄ ſende gv̊te bottē fúr·
die dir doꝛt wol behabē rv̂me dc der wirt v̾habe die túr·
Svn ellú wiſheit iſt ein wiht·
dú h̾ze ſin ertrahten kan·
hat er ze gote mīne niht·
vn̄ ſiht in niht mit voꝛhtē an·
es ſpꝛach hie voꝛ ein wiſer man·
dc dirre welte wiſheit ſi voꝛ gotte ein toꝛheit ſvnd̾ wan·
davō ſo rihte dinē ſin·
dc dv in ſinē huldē lebeſt· vn̄ lâ dich aller dinge an in·
Svn geiſtlich lebē in erē habe·
dc iſt dir gv̊t vn̄ iſt ein ſin·
des willē kvm dvrh nieman abe·
bꝛing in ze diner grůbē hin·
dc wirt an ſeldē din gewin·
enrůche wie die pfaffen leben dv ſolt doch dienē gotte an in·
ſint gv̊t ir woꝛt ir werk ſi krump·
ſo volge dv den woꝛten nach ir werken niht als dv biſt tvmp·
Svn es was ie d̾ leien ſitte·
dc ſi den pfafſen truͤgē has·
da ſv́ndent ſi ſich ſere mitte·
ich kan niht wiſſen vmbe wc·
ich wil dir raten verre bas·
dv ſolt in holt mit trúwen ſin· vn̄ ſpꝛich in wol vn̄ tůſt dv dc·
ſo mac din ende werdē gv̊t·
vn̄ wirt ze lone dir beſchert gotte lichame vn̄ ſin reines blv̊t·
Svn ob dir got hie fvͤgē ein wib·
nach ſînē lobe ze rehter ê·
die ſolt dv haben als dinē lib·
vn̄ fvͤge dc es alſo ſte·
dc úwer beider wille ge·
vs einem herzē vn̄ drin· Was wilt dv danne wunne me·
ob dc geſchiht in trúwē pflege
ſeiet aber dú werre ir ſâmen dar· ſo mvͤſſen ſcheiden ſich die wege·
Svn dv ſolt ſinneklichē tragē·
v̾holn din núwes vingerlin·
din tǒgē niht den tvmbē ſagē·
dc zwein iſt reht daſt zenge dꝛin·
la dich niht vb̾gên den win·
den ſolt dv niht zehvſe laden dc din vîende iht ſpotten din·
ahte vf die zv́ngelere niht
die zwiſchē frúndē w̾re tragen· vn̄ dc in ivdas wiſe geſchiht·
Svn ſwer bi dir ein mêre ſage·
mit woꝛten ims niht vnderbꝛich·
vn̄ ſw̾ dir ſinen kvmb̾ klage·
in ſcham vb̾ den erbarme dich·
der milte got erbarmet ſich·
vb̾ alle die erbarmic ſint dien wibē allen ſchone ſprich·
iſt vnd̾ in einv́ ſelden fri·
da bi ſint tvſent alder me dien tvgent vn̄ ere wonet bi·
Svn wilt dv zierē dinē lip·
ſo dc er ſi vngefuͤge gram·
ſo mīne vn̄ ere gvͤtú wib·
ir tvgent vns ie vō ſoꝛgē nam·
ſi ſint d̾ wūne ein bernd̾ ſtam·
da von wir alle ſin geboꝛn· er hat niht zuht noch reht̾ ſcham·
d̾ dc erkennet niht an in·
er mv̊s der toꝛē einer ſin vn̄ het er ſalomones ſin·
Svn ſi ſint wūne ein b̾ndeſ lieht·
an erē vn̄ an w̾dekeit·
der w̾lte an erē zv̊v̾ſiht·
nie wiſer man dc wid̾ſtreit·
ir name der eren krone treit·
dú iſt gemeſſē vn̄ gewoꝛht mit tvgendē vollig vn̄ bꝛeit·
genade got an vns begie·
do er im engel [214r] doꝛt geſchv̊f dc er ſi gab fúr engel hie·
Svn dv maht noch niht wiſſē wol·
was eren an den wibē lit·
ob es dir ſelde fuͤgen ſol·
dc dv gelebſt die liebē zit·
dc dir ir gvͤte froͤide git·
ſo kan dir niem̾ baſ geſchehen· ze dirre w̾lte ſvnder ſtrit·
du ſolt in holt mit trúwē ſin·
vn̄ ſpꝛich in wol tv̊ſt dc des niht ſo mv̊s ich mich getroͤſten din·
Svn wiltv arzenie nemē·
ich wil dich lere ein getrank·
lat dirs din ſelde wol gezemen·
dv wirſt ſeltē tvgēdē kranc·
din leben ſi kurz oder lank·
lege in din heꝛcz ein reines wib mit ſteter liebe ſvnder wank·
iſt es an w̾dekeit v̾zaget·
als der triâggel eiter tůt ir wib ich guͤte es veriaget·
Sun ich ſage dirs ſvnd̾ wan·
des mannes h̾ze iſt vngeſvnt·
dc ſich niht innan reinē kan·
mit wibes libe zaller ſtvnt·
es wc ein tvgentlich̾ fvnt·
do gůt̾ wibe wart gedaht· hat iemā ſoꝛgē ſweren bvnt·
den truric mv̊t beſtrichē hat
der ſtriche wiblich gvͤte dar alsam ein tǒ ſin not zergat·
Svn ſit dv́ ſelde lit an in·
dú nie mit lobe ir zil vol mas·
ſo diene in g̾ne haſtv ſin·
dv lebſt in eren deſter bc·
got ſin an ſeldē nie v̾gas·
dem ir genade wirt beſchert vn̄ er mit trúwē dienet dc·
dem ſtat d̾ ſchilt zehalſe wol
im kvmt zelône ein blanker arn da im der rieme ligē ſol·
Svn dv ſolt wiſſen dc d̾ ſchilt·
hat w̾dezeit vn̄ eren vil·
den ritt̾ tugende niht bevilt·
der im zerehte volgē wil·
die warheit ich niht enhil·
er iſt d̾ w̾lte ſvnd̾ wan ein hohgemeſſen froͤiden[WS 1] zil·
nimt in ze halſe ein tvmb̾ man·
der im ſin reht erkennet niht da iſt d̾ ſchilt vnſchvldig an·
Svn lat dich got gelebē die zit·
dc er mit rehte wirt din dach·
wc er dir danne froͤiden git·
wiltv im baltlich volgē nach·
weiſt dv wie gamvret beſchach·
der vō deſ ſchilteſ w̾dekeit der moͤꝛin in ir h̾ze bꝛach·
ſi gab im lib lant vn̄ gv̊t·
er git dir ǒch noch eren vil gibſt dv im lip h̾ze vn̄ mv̊t·
Svn wiltú gantzlich ſchilteſ reht·
erkēnē ſo bis wol gezogē·
getrúwe milte kv́ſche vn̄ ſleht·
ſo iſt er niht an dir betrogen·
vn̄ kvmt din lop wol fúr geflogē·
wilt aber leben in frîer wal dien tvgenden allen voꝛ v̾logen·
der rede min trúwe ſi din pfant·
wiltu in ſo zehalſe nemē er hienge bas an einer want·
Svn als din helm genem dē ſtrik·
ze hant bis mvͤtic vn̄ balt·
gedenke an reiner wibe blik·
der grůs man ie mit diēſte galt·
ſitze eben ſwende ſo den walt·
als dir vō arte ſi geſlaht min hant hat manigē abe gevalt·
des ſelbē mv̊ſt ich mich bewegē·
gůt ritt̾ſchaft iſt topel ſpil dú ſelde wil des ſiges pflegē·
Svn nim des gegē dir komēden war·
vn̄ ſenke ſchone dinē ſchaft·
als ob er ſi gemalet dar·
las an din oeſ mit meiſterſchaft·
ie bas vn̄ bas ruͤrte im die kraft·
ze nagelen vierē vf den ſchilt da ſol din ſper gewinnē haft·
oder da der heln geſtriket iſt·
dv́ zwei ſint rehtú ritt̾ mal vn̄ vf der bꝛvſt der beſte liſt·
Svn wiltú zierē dine ivgēt·
dc ſi ze hove in eren ge·
ſnît an dich zvht vn̄ reine tvgent·
ich weis niht wc dir bas an ſte·
wiltú ſi tragē in reht̾ ê·
ſi machet dich dien w̾den w̾t vn̄ git dir dannoch ſeldē me·
ich meine gv̊ter wibe ſegē·
der iſt ein ſo genêmer hoꝛt in moͤhte ein lant niht wider wegen·
Svn dv ſolt bi dien w̾den ſin·
vn̄ la ze hove dꝛingē dich·
der man iſt nach dē ſinnē min·
dar nach als er geſellet ſich·
zerehte ſwig zeſtattē ſpꝛich·
die boͤſe mere dir ze oꝛē tragē vō in dîn ſtete h̾ze bꝛich·
wiltu din oꝛe als manig̾ tůt·
dien velſcheleren bietē dar ſo wirſt dv ſeltē wol gemv̊t·
Svn dv ſolt diner zvngē pflegē·
dc ſi niht vs dē angen val·
ſi lat dich anders vnder wegē·
der eren vn̄ d̾ ſinnen bar·
ſchús rigel fúr vn̄ nim ir war·
gezoͤimet [214v] rehte ſi din zoꝛn· ſi gebe vmbe êre niht ein har·
wirt ſi din meiſt̾ wiſſeſt dc·
ſi ſetzet dich in gotes zoꝛn vn̄ dienet dir der w̾lte has·
Svn beſſer iſt gemeſſen ſwir·
dāne gar v̾howen ane ſin·
ê dc dú rede entrinne dir·
zegehes vs dem mvnde hin·
beſnit ſi wol vf dē gewin·
dc ſi den wiſen wol behage· dc woꝛt mac niht hin wider in·
vn̄ iſt doch ſchiere fúr den mvnt·
wilt des rates volgen niht dv lebeſt an eren vngeſvnt·
Svn dv ganc niht vngebettē·
an frúndes noch an viendes rat·
eſ mac den man in ſchande wettē·
ob er da ſitzet oder ſtat·
da man ſin hete g̾ne rat·
ſvn dv ſolt ſo niht dꝛingen zv̊ fúr war es iſt ein miſſetat·
kvmſt aber dú dar vō frúndes bette·
ſo beſlús die ſchame fúr den mvnt· dc ſich din zv̄ge iht vb̾trette·
Svn hoh geburt iſt an dem man·
vn̄ an dem wibe gar v̾loꝛn·
da wir niht tugenden kieſen an·
als in den rin gewoꝛfen koꝛn·
ſwer tvgende hat derſt wol geboꝛn·
nv merke reht· was ich dir ſage ich han zefrúnde mir erkoꝛn·
den nidern bc der erē gert·
dan einē hohē ſvnd̾ tugent d̾ húre iſt boͤſer dāne vert·
Svn wiſſeſt dc dú mâſſe git·
vil erē vn̄ w̾dekeit·
die ſolt dv mīnen ellú zit·
ſo wirt din lob din wirde bꝛeit·
iſt dc dien wandelberē leit·
was vmbe dc d̾ boͤſen has die biderbē ſeltē[WS 2] ie vermeit·
leb dv in tvgentlicher aht·
vn̄ la den krankē alſo lebē als im vō arte iſt geſlaht·
Svn dv ſolt habē vn̄ mīnen gůt·
doch ſo dc es dir niht lige obe·
benimt es dir h̾ze vn̄ frien mv̊t·
ſo ſtat din leben in krankē lobe·
gv̊t dc iſt gitikeit ein klobe·
dem es iſt lieber dāne got vn̄ weltlich ere ich wēne er tobe·
den es alſo gevaſſet fúr·
dc er ſich âne[WS 3] ir beider ê· dāne er dc eine gar v̾kúr·
Svn ſo der vogel ê reht̾ zit·
vō ſinem neſte fliegē wil·
ſich ſelbē er vil lihte git·
den tvmbē kindē zeinē ſpil·
die rede ich dir gelichē wil·
nimſt dv dich an des dv niht maht vol endē vn̄ dir iſt zevil·
da mv̊ſt dv ligē an erē lan·
ſo were fúr ere beſſer dir vn̄ were es nie gevāgen an·
Svn habe das dv getragē maht·
dc dir zeſwere ſi la ligen·
ſwer gerne ie vb̾ hǒbet vaht·
der mohte deste wirs geſigē·
dir iſt der wîſen lop v̾zigen·
wiltv ze gehes mv̊tes ſin ân allen rat vn̄ ǒch verſwigen·
ſo kvmt dir gar dc ſpꝛich wort wol·
an mv̊te al zegeher man vil trêgē eſel riten ſol·
Svn dv ſolt ſelten ſchaffen iht·
ân diner wiſen frúnde rat·
ob dir des an gelvnge niht·
dc were niht ein miſſetat·
ſwer wiſer lúte lere hat·
vn̄ in mit willen volget nach dem gat zeſeldē vf ſin ſât·
dú mêre dike zweient ſich·
da von ſolt dv dc beſte wellen vn̄ volge dem dc eret dich·
Svn ſwer ſich ſelbē eren wil·
d̾ nimt getrúwes rates war·
man v̾lúſet gv̊ter rête vil·
an einē h̾zen tvgenden bar·
ſwer dienet vn̄ râtet dar·
da manſ ze danke niht enpfat d̾ v̾lúſet ſine wile gar·
ſwas frúnt frúnde geratē mac·
ern welle ſelbe ſtúrē ſich dc iſt in einē bach ein ſlag·
Svn ſi iehēt alle es bꝛēne frú·
dc zein̾ neſſelen w̾den ſol·
din ivnger mv̊t dc ſelbe tů·
dc kvmt dir in dem alter wol·
mit dir ich leides mich erhol·
min troſt iſt an dich einen kon[WS 4] din lieb min lieb in leit min dol·
got tů mich zweier ſoꝛgen bar·
dc dv iht w̾deſt vngemv̊t vn̄ dc din ſele iht miſſevar·
Svn dꝛiſſec iar ein tôꝛe gar·
d̾ mv̊s ein toꝛe fúrbas ſin·
die wiſē ſpꝛechent es ſi war·
es iſt vil dike woꝛden ſchin·
vn̄ iſt ǒch der gelǒbe min·
gewōheit iſt da ſchvldig an dú git dem libe ſolhen pin·
des er vō kintheit iſt gewō·
es ſi im ſchade es ſi im from da kvmt er ane got niht von·
[215r] Svn dv ſolt houeliche ſitte·
in dinē ſinnen lâſſen pfaden·
behvͤte dich voꝛ einem ſnitte·
der tůt an eren groſſen ſchaden·
da mitte wart iv das vb̾ladē·
der in dem ſnitte noch fvndē wirt der mv̊s mit im zehelle baden·
Ich meine vntrúwe vns ſeit dú ſchꝛift·
ſi ſi d̾ armē ſele doꝛt vn̄ hie deſ libeſ ein v̾gift·
Svn dv ſolt kúſcher woꝛte ſin·
vn̄ ſteteſ mv̊tes tv̊ſt dv das·
ſo habe es vf die trúwe min·
dv lebeſt in eren deſte bas·
trage niemanne nît noch langē has·
biſ gegen den vienden hohgemv̊t bis frúndē niht mit dienſte las·
da bi in zv́htē wol gezogē·
vn̄ gruͤſſe da dv gruͤſſen ſolt ſo hat dich ſelde niht betrogen·
Svn hohvart vn̄ gitekeit·
dú zwei ſint boͤſe nachgebvrn·
an den der tiefel ſich v̾ſneit·
dc im ſin ſvͤſſe wart zeſvr·
ſin ſchoͤne noch ſwerzer danne ein ſur·
in ſleht noch húte vn̄ iemer me zehelle dꝛvmbe ein bitter ſchur·
der in dem ſnitte fvndē wirt·
dem git in ſinem hvſe rǒch der ſelbe ſwarzer helle wirt·
Svn ich han lange har v̾nomē·
ſwer vb̾ ſich mit hohvart wil·
dc im ſin lebe mac darzv̊ komē·
dc ſich v̾vellet gar ſin ſpil·
ein ieglich man hat eren vil·
d̾ rehte in ſiner mâſſe lebt vn̄ vb̾ miſſet niht ſin zil·
ſwer ſich ſo zv́het vn̄ ie zo·
dc in ſin fůre machet wert d̾ wirt an eren billich ho·
Svn wil dir liebē gv̊t gemach·
ſo mv̊ſtv eren dich bewegē·
ein ivngē man ich nie geſach·
dú zwei in gelicher wage wegē·
was ſol ein ivnger lip v̾legē·
der vngemach niht lidē kan noch ſinneklich nach eren ſtegē·
es iſt mir ane zwivel kvnt
es lǒfet ſelten wiſú mv̊s ſlafēder vohen in den mvnt·
Svn wiſſiſt dc v̾legenheit·
iſt gar dem ivngē man ein ſlac·
es iſt dir offēlich geſeit·
dc niemā ere habē mac·
noch h̾zeliebe ſvnder klak·
gar ane kvmb̾ vn̄ nôt der lǒch ſo niht in den ſak·
ſwer ſich voꝛ ſchandē wil befridē·
d̾ mac gebergē niht den lib er mv̊s enblanden an den liden·
Svn beidú lv̊der vn̄ ſpil·
ſint libes vn̄ d̾ ſele val·
der âne mâſſe in volgē wil·
ſi machēt bꝛeitú eigē ſmal·
ſwer lebt ân êre in frîer wal·
der wirt dien w̾den ſchiere vnwert vn̄ hvſet in der affen tal·
ſwer ſvs v̾lúſet ſine habe·
mit diſen valſchē fůrē zwein d̾ lege baſ in einem grabe·
Svn ſwen ſîn ſin v̾leitet ſo·
dc er vnreht im ſelbē[WS 5] tůt·
iſt d̾ bi wîſen lútē fro·
da ſol man kieſen tôꝛē mv̊t·
dú rúwe iſt nach der ſchulde gv̊t·
ob ſi vō h̾zen rehte vert· ein vol von einer wilden ſtůt·
vn̄ v̂s gevangē wirt ê zam·
ê dc ein vngeratē lib gewinne ein h̾ze dc ſich ſcham·
Svn twinc des dinē frien ſin·
dc dv zehvſe rihteſt dich·
ein teil ich vngerihtig bin·
wan tůt noch lât vn vil dvr mich·
den armē gib ſnit vn̄ bꝛich·
mit willē diner reinen habe ob allē retē dc rate ich·
es iſt dir gv̊t vn̄ wirt ǒch mir·
ich han mit erē her gelebt zehvs wirf ich den ſlegel dir·
Svn ob ich vngeruͤmet wol·
vn̄ ane vnfůge ſpꝛechē mac·
mit liebe ich dich beſcheidē ſol·
ſit ich vō erſte hvſes pflac·
da kvm ich vō niht einē tac·
min vmbeſetzen wiſten wol wie do min woꝛt in eren lac·
ich hate ǒch noch vil gv̊tē mv̊t
vn̄ willig h̾ze wan dc mir dc alt̾ grôſſen ſchaden tůt·
Svn ſwer dc hvs wol habē wil·
der mv̊ſ dꝛú ding zeſtúre han·
gv̊t milte zvht ſo lit ſin ſpil·
er iſt da bi ein froͤlih man·
ders wol dien lútē bietē kan·
ſo tůt ſin bꝛot dien nemēden wol vn̄ lachēt beide einander an·
ſvn ſint dir niht die tugende bi·
ſo mac d̾ gaſt wol riten fúr ſwie gar er nas vn̄ mvͤde ſi·
Svn ſw̾ mit tvgēden hvſes pfliget·
d̾ nimt an w̾dekeit niht abe·
vn̄ alſo mit der mâſſe wiget·
dc im gevolgē mac ſin habe
vn̄ krvche d̾ an einē ſtabe·
gote vn̄ d̾ w̾lte wer er wert die rede ich in din h̾ze grabe·
wil ſi da inne weſē niht·
als einē vogel d̾ ê zit· vō neſte flúget dir geſchiht·
[215v] Svn hus han iſt ein w̾dekeit·
dú bi dē hohſten eren vert·
ſw̾ ſi mit ſchonē ſinnen treit·
wie wol ſich der in erē nert·
dc gv̊t reineklich v̾zert·
dc niht ein ſchade geheiſſē mac· vn̄ zwen from ſint dir vō beſchert·
gotes lon d̾ w̾lte habe danc·
d̾ dv́ zwei wol behaltē kan dē richet wol ſin aker ganc·
Svn zwei woꝛt erent wol dē man·
d̾ ſich wil erē mit in zwein·
ſo dc er ſi behaltē kan·
dc eine iſt ia dc and̾ nein·
wie zieret golt dc edel geſtein·
als tv̊nt gewerú woꝛt den lip· er iſt niht fleiſch vnz vf dc bein·
dē alſo ſlipfic iſt d̾ ſin·
dar er ſin ia genennet hat dc er ſin nein da ſchúſſet hin·
Svn flúch dc dich iht binde ein bant·
dc iſt geſtriket in d̾ maht·
dc dv gebvndē biſt zehant·
voꝛ gote in krefteklicher acht·
d̾ wirt in ſine ſtrike bꝛaht·
ſo dc in vinde da der tot we im dc ſin ie wirt gedaht·
dc bant iſt d̾ gediente ban·
d̾ klēmet in der helfe alſo dc ivdaſ nie die not gewan·
Svn dānoch and̾ kraft er treit·
dē er gevaſſet an ſin ſeil·
er nimet al der kriſtenheit·
gemeinde vn̄ aller ſelden teil·
ſin wūdv́ ſele wirt niht heil·
kvmt er mit rehte niht der von ie groͤſſer wirt d̾ ſv́nde meil·
gebet almv̊ſen wirt v̾loꝛn·
vn̄ ſwc er gv̊tes mac getůn die wile in ſtichet dirre doꝛn·
Svn âchte iſt ǒch ein bitt̾ krůt·
ſtrâſſe vn̄ ir ſtige g̾ne mit·
ſi mac v̾leitē dir die hut·
ſwie gv̊t geleite man dir git·
gerihtes vber dich iſt zit·
ſwa man dich hoͤret oder ſiht die wile vf dir ir beie lit·
da la dich īne niht v̾ſmidē·
dehein zvnge vn̄ iſt d̾ riht̾ gv̊t· mac voꝛ dē tode dich befriden·
Svn ich wil dir niht mere ſagē·
d̾ mâſſe ein zil geſtôſſen ſi·
dv maht ſin alles niht getragē·
nim vs dien râte allen dꝛi·
lege ſi dem h̾zen nahe bi·
ob es niht beſſer w̾den mac wirt goteſ mīne niem̾ fri·
biſ warhaft zúhtic ſvnd̾ wanc·
manic tvgent ir flus nimet vō dꝛin· behalt ſi wol habe iemer danc·
Uatter dv hast vaterlich mir·
gerâtē alſ ein wiſer man·
ich wil vil g̾ne volgen dir·
ob mir got ſiner helfe gan·
dú elliv dinc wol endē kan·
ſîn vnvolmeſſē hohú tvgent bitte ich ǒch iemer vn̄ man·
dc ich im hie zedienſte lebe·
alſo dc er mir dꝛvmbe doꝛt ſins vater himnelriche gebe·
Uatter ich bin kint doh ſihe ich wol·
dc diſú w̾lt ein gǒggel iſt·
ir froͤide erloͤſchet als ein kol·
ir beſtú mīne wirt ein miſt·
ir troſt iſt gar ein vngeniſt·
ſi lat ir frúnde in ſwach̾ habe des dv wol īnen woꝛden biſt·
dv haſt ie har gedienet ir·
nv merke waſ ir trugeheit zelône habe gegeben dir·
Vatt̾ alter lib vn̄ mvͤde lit·
dú zwei ſint niht nah voller habe·
dv wer ê ſnel nv iſt din trit·
zenahe leider bi dē ſtabe·
da grvſet mir vō ſchuldē abe·
ob dine ſchvlde manicvalt dem libe volgēt hin zegrabe·
din rat iſt kranc· ob dc geſchiht·
deſ manneſ wiſheit iſt ein wint iſt er im ſelbē wiſe niht·
Uater wîſē māne ſchone zimt·
dc er wol tů mit ſtetē ſittē·
da bi ein tvmb̾ bilde nimt·
dc wirt vil lihte ſus v̾mittē·
ein gar alt man mit tvmbē ſitē·
d̾ niht erkennet was er iſt vn̄ waſ got hat dvr in erlittē·
d̾ iſt in toꝛē acht gemv̊t·
eſ iſt ein lob voꝛ allē lobe d̾ an dē ende rehte tůt·
Uat̾ mit vrlube wil ich dir·
min h̾ze entſlieſſē vber al·
eſ mac ſich niht v̾heln bi mir·
du ſolt fúr diner ſv́ndē val·
legē vf din eigen ein ſpital·
vn̄ ſolt dich ſelbe ziehen dꝛin ich var mit dir in frier wal·
alle vnſer habe ſvln wir dar ſeln·
vn̄ fúr d̾ w̾lte trugeheit dc ſvͤſſe himelriche weln·
Svn die rede vs dē h̾ze din·
geſpꝛochē hat ein reiner geiſt·
ich froͤwe mich in dē h̾zen min·
dc dv ſo vil vō gote weiſt·
dins rates wil ich ſin volleiſt·
wā da ſtůnt ie min wille zv̊ doch lies ichs dvr dich aller meiſt·
ich han gelebt nv liebē tag·
dc dv ze gotte wilt dich begebē vn̄ ich mit dir gebvͤſſen mac·
Svn ſwas ich froͤidē ie gewā·
die ſint [216r] bi diſen froͤidē blint·
ſit ich vō dir v̾nomē han·
dc dir die froͤide vnmere ſint·
ich ſage dir h̾zeliebeſ kint·
wir kǒfen in der ſache niht· an dinem mv̊te niht erwint·
ob wir hie vnſers zwiuel leben
vmb eines dc vns iemer wert mit froͤidē willeklichen geben·
Us ǒgen mv̊ſt er wangē badē·
vō h̾zeliebe dc geſchach·
d̾ ſvn ſpꝛach vatt̾ ir tůnt ú ſchaden·
ir volgent wibes ſittē nach·
die man ie gerne weinē ſach·
da hoͤꝛet niht wan froͤide zv̊ vn̄ hie des libes vngemach·
ia iſt es niht ein kindē ſpil·
der mit deſ libes arebeit zerehte ſv́nde búſſen wil·
Got h̾re dinv́ trinitat·
vn̄ ǒch din ſtarkú goteheit·
erbarmē ſol min miſſetat·
des man ich din erbarmekeit·
dú rehtem rúwē iſt bereit·
dc dv mir ſtete rúwe gebeſt ſo dc mir ſi vō ſchuldē leit·
dc hie der lip geſv́ndet habe·
dc deſ iht ſi dú ſele ein pfant dvr dine tvgent des hilf mir abe·
Got h̾re dv́ weiſt wol dc ich bin·
in ſv́nden ein vertiefet man·
vn̄ dc min ſelden frîer ſin·
noch ſtete rúwe nie gewan·
ſit ich mich ſv́ndē erſt v̾ſan·
nv bin ich in min alter komē vn̄ ruͤfe dine marter an·
vō miner ſchulde manicvalt·
dc als dē ſchacher mir geſchehe[WS 6]der ſpeter trúwe niht engalt·
Ich bin in den wingartē bꝛaht·
dvr buwē hǒwen vn̄ ieten·
vn̄ han mich leid̾ erſt bedaht·
do ich vil frv̊ was dar gebetten·
dc ich den rat han vbertrettē·
nv hat dc alter mit gewalt in ſinē ſtrik mich ſo gewettē·
dc ich v̾ſlafen han dv́ zit·
da vō mv̊s ich zedanke nemē ein lôn dē mir der meiſter git·
Doch tv̊t mir der gedinge wol·
dē weiſ ich endeliche war·
bvwe ich mit trúwē als ich ſol·
an lone ich deſte bc gevar·
in wart gelich gelonet gar·
die frů ze tage werke[WS 7] zit vn̄ ſpate kâmē w̾ken dar·
ich bin niht gv̊teſ lones w̾t·
ein teil ich mich v̾ſlafen han min rúwe edoch genaden gert·
Dv biſt genedig vn̄ gůt·
milte vn̄ erbarmig h̾re got·
dē ſv́nder ober ſinen mv̊t·
vō ſv́ndē nimt dvr din gebot·
ſo ſtarch iſt miner ſv́ndē not·
eſ vnd̾var din gotlich tvgent dv́ rehter rúwe ie helfe bot·
min ſele mv̊ſ in bůſſe dagē·
das minē lip min mv̊t̾ ie ze diſen noͤtē hat getragen·
Got h̾re ſit dú kleinē kint·
vō ir geburte tages alt·
niht gar vō ſúndē reine ſint·
wie wirt es vmbe mich geſtalt·
deſ hat din barmekeit gewalt·
min pfant ſtat leider vf den ſchaden des ich noch nie ein teil v̾galt·
hilf h̾re ich mac v̾gelten niht·
din milte ſol mir ſtúre gebē der pfand̾ grôſſer bvͤſſe giht·
Got dir ſint ellú herzen kvnt·
ein winkel nie ſo enge wart·
vō oben abe vnz in den grūt·
d̾ diner wiſheit ſi v̾ſpart·
din tvgende ſint ſo reiner art·
dc dv dē ſv́nder niht v̾tůſt gerúwet in d̾ ſúndē vart·
vn̄ hat zebv̊ſſe veſten ſin·
dv ſihſt an minē h̾zē wol dc ich in ſtetē rúwē bin·
Die gabe haſt dv mir gegebē·
gib mir noch diner helfe me·
la mich hie alſe lange lebē·
dc mir geſchehe in bůſſe we·
ze wol iſt mir geſchehē ê·
ich lie dur dine voꝛhte niht· noch dvr din liebe alſam owe·
ſol ich dc hie gebuͤſſen niht·
die wile ich an der w̾lte lebe wie we mir dāne doꝛt geſchiht·
Maria magdalena waſ·
mit hǒbet ſv́ndē vberladē·
vō ſtarkē rúwē ſi genas·
man ſach ſi dine fuͤſſe baden·
mit trehen[WS 8] fúr d̾ ſv́nden ſchadē·
dē miſte iob zeteile wart in rúwē âſſen in die madē·
ſvſannen wart mit luge v̾gebē·
die fvndē alle helfe an dir dv gebe in doꝛt din iem̾ leben·
Din vngemeſſen kraſt lonam·
dc mv̊ſ man fúr ein wūder wegē·
vſ eineſ viſcheſ wanbe nam·
da inne er wc dꝛîe tage gelegē·
dꝛin kindē half din gotlich ſegen·
dc in dv́ flāme niht entet ich bin in ſv́ndē gar v̾legē·
dc rúwet mich vn̄ iſt mir leit·
dv maht ǒch wūd̾ an mir tůn ſo kreftic iſt din barmekeit·
[216v] Din kraft iſt allen kreftē voꝛ·
dv hoͤheſt niderſt ſwen dú wilt·
was half daſ nabuchodonoſoꝛ
gewalteſ hat vn̄ richeit vil·
vō hohuart ſich v̾uiel ſin ſpil·
dc es zewalde wildes gie d̾ tage ein lanc gemeſſen zil·
an allen vieren leid̾ bar·
voꝛ dinē zoꝛne dē ich han v̾dienet h̾re mich bewar·
Ich tůn hie mine bihte dir·
als ein ſv́nder ſol vn̄ mv̊s·
erzeige dine helſe mir·
ſo dc mir w̾de ſv́ndē bv̊s·
die wile ich hant mac oder fůs·
geruͤrē deſ wil ich dich bittē maget vn̄ mv̊ter dvr den grůs·
dē dir vō gotte d̾ engel ſpꝛach·
ze dinē kinde ſpꝛich min woꝛt din helfe ie ſtarken kvmber bꝛach·
ICh han d̾ w̾lte mich begebē·
vn̄ ſol nv als in ſv́ndic man·
in rúwē vn̄ in bv̊ſſe leben·
we dc ich ie den mv̊t gewan·
d̾ wider dich iht hat getan·
dc rúwet mich vn̄ iſt mir leit nv la mich dine hulde han·
nah beſſervnge herre got·
genedekliche vber mich erge din wille vn̄ din gebot·
Uon h̾zen in v̾gebē ſi·
die mir ie har getaten leit·
min eigē lúte lâſſe ich fri·
min hv̊be gelt ſmal vn̄ bꝛei·
dc man mir bûte vn̄ ſneit·
fúr eigē des enzien ich mich ich hans vf ein ſpital geleit·
es fuͤget der armen ſin·
ich vn̄ min ein geboꝛner ſvn zv̊ in vns wellē ziehē dꝛin·
Des vat̾ lere ein ende hat·
Der mv̊ter lere dar nach gat·