Doctor Brants Narrenschiff/Von Eigenrichtigkeit

« Von blindem Eifer Sebastian Brant
Doctor Brants Narrenschiff
Vom Glücksrad »
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).


[45v]

Wer vff syn eygnen synn vßflügt
Der selb zuon vogelnaester stygt
Das er offt / vff der erden lygt




Von Eygenrichtikeyt.


Der kratzt sich mit den dornen scharpff
Waen duncket das er nyemans bdarff
Vnd meynt er sy alleyn so kluog
Vnd allen dingen witzig gnuog

[46r]

5
Der jrrt gar dick vff ebner stroß

Vnd fuert sich jnn eyn wilttniß groß
Das er nit licht kumbt wider heyn /
We dem der velt / vnd ist alleyn
Zuo kaetzer synt vil worden offt

10
Die woltten nit / das man sie strofft

Verlossend sich vff eygne kunst
Das sie eruolgent ruem vnd gunst
Vil narren fyelen ettwann hoch
Die stygen vogelnaester noch

15
Vnd suochten waeg / do keyner waß

On leytter mancher nyder saß
Verachtung dick den boden ruert
Vermessenheyt vil schiff verfuert
Nyemer erfolget nutz noch ere

20
Wer nit mag han / das man jn lere

Die welt wolt Noe hoeren nye
Biß vndergingen lüt vnd vich /
Chore wolt duon das jm nit zam
Dar vmb er mit sym volck vmb kam

25
Das sunder thier das frißt gar vil

Wer eygens kopffs sich bruchen will
Der selb zertrennen vnderstat
Den rock gar offt / der do ist on nat
Wer hofft dem narrenschiff entgan

30
Der muoß des wachs jnn oren han

Das brucht Vlisses vff dem mer
Do er sach der Syrenen her
Vnd er durch wißheyt von jnn kam
Do mit eyn end jr hochfart nam