Doctor Brants Narrenschiff/Vom Tanzen

« Selbstgefälligkeit Sebastian Brant
Doctor Brants Narrenschiff
Vom nächtlichen hofieren »
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).


[76v]

Das best / am dantzen / ist das man
Nit yemerdar duot für sich gan
Vnd ouch by zyt vmb keren kan



Narrenschiff (Brant) 1499 pic 0062.jpg

Von dantzen


Ich hielt nah die für narren gantz
Die freüd vnd lust hant jn dem dantz
Vnd louffen vmb / als werens toub
Mued fueß zuo machen jnn dem stoub

[77r]

5
Aber so ich gedenck dar by

Wie dantz / mit sünd entsprungen sy
Vnd ich kan mercken / vnd betracht
Das es der tüfel hat vff bracht
Do er das gulden kalb erdaht

10
Vnd schuoff das got wart gantz veracht /

Noch vil er mit zuo wegen bringt
Vß dantzen vil vnratts entspringt
Do ist hochfart / vnd üppikeyt
Vnd fürlouff der vnlutterkeyt

15
Do schleyfft man Venus by der hend

Do hatt all erberkeyt eyn end /
So weys ich gantz vff ertrich
Keyn schympf der sy eym ernst so glich
Als das man dantzen hat erdocht

20
Vff kilwih / erste meß ouch brocht

Do dantzen pfaffen / mynch / vnd leyen
Die kutt muoß sich do hinden reyen
Do loufft man / vnd würfft vmbher eyn
Das man hoch siecht die blossen beyn

25
Ich will der ander schand geschwigen

Der dantz schmeckt bas dann essen fygen
Wann Kuontz mit Maetzen dantzen mag
Inn hungert nit eyn gantzen dag
So werdent sie des kouffes eyns

30
Wie man eyn bock geb vmb eyn geyß

Soll das eyn kurtzwil syn genant
So hab ich narrheyt vil erkant
Vil wartten vff den dantz lang zytt
Die doch der dantz ersettigt nit