Doctor Brants Narrenschiff/Vom Ende der Gewalt

« Von närrischen Arzneien	Sebastian Brant Doctor Brants Narrenschiff	Von Gottes Vorsehung »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

So groß gewalt vff erd nye kam
Der nyt zu^o zytten / end ouch nam
Wann jm syn zyl / vnd stündlin kam

Von end des gwaltes

Noch fyndt man narren manigfalt
Die sich verlont vff jren gewalt
Als ob er ewiklich solt ston
Der doch du^ot / wie der schne zergon

5

Julius der Keyser / was genu^og

Rich / ma^echtig / vnd von synnen klu^og
Ee dann er mit gewalt an sich
Brocht / vnd regyert das Ro^emsche rich
Do er den zepter an sich nam

10

Syn sorg vnd angst jm huffecht kam

Vnd was so witzig nit an rott
Er würd dar vmb erstochen dott /
Darius der hat groß / ma^echtig land
Vnd wer wol blyben heym on schand

15

Vnd hett behaltten gu^ot vnd ere

Aber do er wolt su^ochen mer
Vnd haben das / das syn was nitt
Verlor er ouch das syn dar mitt /
Xerxes der brocht jnn kriechen landt

20

So vil des volcks als meres sandt

Das mer mit schiffen er bedeckt
Er mo^echt die gantz welt han erschreckt
Aber was wart jm me dar von
Er greiff Athenas grüslich an

25

Glich wie der Lo^ew / angrifft eyn hu^on

Vnd floch doch als die hasen thu^on
Der künig Nabuchodonosor
Do jm zu^o fyel me glück dann vor
Vnd er Arfaxat überwandt

30

Meynt er erst haben alle landt

Vnd setzt eyn go^etlich gewalt jm für
Wart doch verwandert jn eyn thyer
Der mo^echt ich wol erzalen me
Inn altter / vnd jn nuwer ee

35

Aber es duncket mich nit syn nott

Gar wenig sint jn ru^owen dott
Oder die stürben an jrem bett
Die man nit sunst erdo^ettet hett
Har by mercken jr gwaltigen all

40

Ir sitzen zwor jn glückes fall

Sindt witzig / vnd trachtend das end
Das gott das radt üch nit vmb wend
Vo^erchtend den herren / dyenent jm
Wo üch syn zorn ergryfft / vnd grym

45

Der kurtzlich würt entflammen ser

Würt üwer gwalt nit bliben mer
Vnd werden jr / mit jm zergan
Ixion blibt syn rad nit stan
Dann es loufft vmb / von wynden kleyn

50

Sellig / wer hofft jnn gott alleyn /

Er felt / vnd blibt nit jn der ho^eh
Der steyn / den waltzt mit sorg vnd we
Den berg vff / Sisyphus der tor
Glück vnd gwalt / wert nit lange jor /

55

Dann noch der altten spruch vnd sag

Vnglück vnd hor / das wechßt all tag /
Der vnrecht gwalt / nymbt grüntlich ab
Als Jezabel zeygt / vnd Achab
Ob schon eyn herr sunst hatt keyn vynd

60

Mu^oß er besorgen doch syn gsynd

Vnd vnderwil syn na^ehsten fründ /
Die bringen jnn vmb syn gewalt
Zambry sins herren rich noch stalt
Vnd dett an jm mort vnd dotschlag

65

Vnd wardt eyn herr vff syben tag /

Alexander all welt bezwangk
Eyn diener dott jn / mit eym tranck /
Darius entrann / vnd was on nott
Bessus syn diener stach jn dott /

70

Also der gwalt sich enden du^ot

Cyrus der tranck syn eygen blu^ot /
Keyn gwalt vff erd / so hoch ye kam
Der nit eyn end mit truren nam
Nye keyner hatt so ma^echtig fründ

75

Der jm eyn tag verheissen künd

Vnd sicher wer eyn ougenblick
Das er solt han gwalt / vnd glück
Was die welt acht vffs aller best
Das würt verbittert doch zu^o lest

80

Wer überhebt sich das er stand

Der lu^og vnd schlipff nit vff dem sand
Das jm nit werd schad / spott / vnd schand
Groß narrheyt ist vmb grossen gwalt
Dann man jn seltten langzyt bhalt

85

So ich durch su^och all rich vnd ha^er

Assyrien / Meden / Persyer /
Macedonum / vnd kriechen landt
Carthago / vnd der Ro^emer standt
So hatt es als gehan syn zyl

90

Das ro^emsch rich blibt so lang gott vill /

Gott hat jm gsetzt syn zyt / vnd moß
Der geb / das es noch werd so groß
Das jm all erd sy vnderthon
Als es von recht / vnd gsatz solt han