Doctor Brants Narrenschiff/Der sorglose Narr

« Die Lehre der Weisheit	Sebastian Brant Doctor Brants Narrenschiff	Von zu viel Sorge »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

Wer meynt das jm gantz nüt gebrest
Vnd er glück hab vffs aller best
Den trifft der klüpfel doch zu^o lest

Von vberhebung glucks

Der ist eyn narr der rümen gtar
Das jm vil glücks zu^o handen far
Vnd er glück hab jn aller sach
Der wart des schlegels vff dem tach

5

Dann glücksal der zergenglicheyt

Eyn zeychen ist vnd vnderscheyt
Das gott des menschen sich verru^ocht
Den er zu^o zytten nit heym su^ocht
Im spruchwort / man gemeynlich gyecht

10

Eyn fründt den andern offt besieht

Eyn vatter strofft offt synen su^on
Das er vorcht hab / vnd recht ler tu^on
Eyn artzt / gibt sur vnd bitter tranck
Do mit dest ee gena^eß der kranck

15

Eyn scherer meysselt / schnydt die wund

Do mit der siech bald werd gesunt /
We we dem krancken wann verzagt
Der artzt / vnd er nit strofft / nochsagt
Das solt der siech nit han gethon /

20

Er solt das / vnd das han gelon /

Sunder er spricht / gent jm recht hyn
Als das er wil / vnd glustet jn /
Als wa^en der tufel bschissen wil
Dem gibt er glück / vnd richtum vil

25

Gedult ist besser jn armu^ot

Dann aller welt glück / richtum / gu^ot /
Sins glücks sich nyemans vberhab
Dann wenn gott will / so nymbt es ab
Eyn narr ist / wer do schriget dyck

30

O glück wie loßtu mich / o glück

Was zychstu mich / gib mir so vil
Das ich eyn narr blib noch eyn wil
Dann grosser narren wurden nye
Dann die allzyt glück hatten hye