Die Schedelsche Weltchronik (deutsch):285

 

284 <<<Vorheriges Blatt	Die Schedelsche Weltchronik    Blatt CCLXXXV	Nächstes Blatt>>> 286
fertig	Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.

CCLXXXIV verso:

Von Hyspannia

HJspania ein fast weytte gegent am erdpoden den besten wol zeuergleichen an waffen mechtig ist zu vnßern zeiten in fu^enf ko^enig getaylt. den ersten vnd den gro^esten nennt man den ko^enig Castelle. den andern zu Arrogon. den dritten zu Porthegalia. den vierden Nauerre. den fu^enften Granate. den letsten setzen sie in Castella dem edeln vnd weytherrschenden ko^enigreich. Dess ko^enige auß dem plu^ot der Gothier gewachßen das geschlecht nye verwandelt haben. Vnnd wiewol Aluarius von Luna arrogonischer nation auß edelm geschlecht. doch außerhalb der ee geporn. dieweil ettwen Johanna dem ko^enig also verku^endet het. das er einiger des reichs vnnd des ko^enigs gewaltig gesehen wu^erd. vnd Johannem den Nauerrischen ko^enig. vnd Heinrichen den maister sant Jacobs ritterschafft mit seinem gewalt vnnd das ko^enigreich zeregiren mit der waffen betru^eebet het. yedoch lebet er darnach ettwielanng nach entsetzung seiner gu^eeter auß widerstand der ko^enigin vom hof vertriben in einem abgesu^enderten stand. Vnlang darnach wardt mit den obgenanten Johanne vnd Heinrico ein ernstlicher streit darinn vil lewt auff beder seyten ernyderlagen. aber Aluarus behielt den obsyg. vnd Heinrich wardt in demselben streyt an einer hand wund vnd starb in ku^ortzen tagen darnach. Sein o^eberkeit vnd herrschung erlanget aluarus vnd wardt ettwielang darnach als ein vater vnd anschicker des ko^enigreichs gehalten. doch gieng er zu letst auß neyd der gewaltigen ernyder. Dann dz er einen edeln der ime auß befelhe des ko^enigs nit angeneme ding verku^endet auß seinem hawß durch ein fenster abstu^ertzen hieß do wardt er alßpald gefangen vnd mitten auff dem margk enthawbt. ein man hohs gaists zu haws vnd zu feld beru^embt. vnd dem alweg grosse ding in dem gemu^eet sassen. Darnach hat Johannes ettwieuil iar durch sie selbs das ko^enigreich geregirt. Nach seinem absterben empfieng sein sun Heinrich das ko^enigreich ein volmu^eetiger iungling vnd der auffrichligkeit girig. der dann sein vorige gemahel verlassend ein andere auß Portugalia der kaiserin schwester zu der ee name vnd in das ko^enigreich Granate mit hereßkraft ziehende einen grossen tail der feind landschaft zerru^edet vnd verwu^eestet hat. In dem Nauarrischen ko^enigreich hat der sun wider den vater vnnd der vater wider den sun zu den waffen gegriffen. Zu letst wardt der sun auß dem reich vertriben vnd flohe zu Alphonso seinem vetter dem ko^enig zu arrogonia vnd sicilia. Nach der gepurt Cristi .M.cccc.xci. iar^[1] ist das gantz ko^enigreich Betice yetzo Granata genant nach vberwindung des haidnischen volcks vnd nach fangknus irs ko^enigs vnnd nach erobrung der statt Granata mit schwerer belegerung von den cristen bestritten vnd besetzt wardt.

CCLXXXV recto:

Blat CCLXXXV

Portugalia

IN Portugalia ist Petrus mit dem zunamen der vnsprechend (dann also werden die su^ene der ko^enig ee sie regiren genennt) ein fu^erst gross namens. der schier alles Europam die lere seiner tugennt zaigende durchwandert hat[.] Als er in pflegnus weise des ko^enigreichs ettwielang mit grossem lobe gepflegen vnd nicht mit mynderm glawben Alphonso seinem vetter vnd tochterman widerstand gethan het vnd zu letst nach entstandnen zwittrechtigkeytten in wachsendem hass die sach zu einem streyt komen was mit geschoss verletzt gestorben. ein man grosser thate. der ettwen vnder kaiser Sigmunden mit fechten wider die Tu^ercken grossen ru^om vnd lobe erlannget. Darnach hat Alphonsus ein aller senftmu^eetigster fu^erst. hohs hertzens vnnd mit sundrer klu^ogheit begabt das ko^enigreich geru^eesamlich inngehalten. Als ime sein allerliebste gemahel starb do mocht ine nymant vberreden ein andere zenemen. sunder er wendet alle sein sorg dahin das er ettwas handelte das ime lob vnd dem cristenlichen stand frucht brechte. Darumb nach beru^effung vnd aufforderung des ko^enigs adels vnd mechtigkeit name er das creu^etz an sich vnd verhieße wider die Tu^ercken einen heerzug. Als aber in nachfolgenden iaren Heinrich sahe das die gegent des Portugalischen ko^enigreichs in kleiner rifier beschlossen wardt also auß begirde das ko^enigreich zeerweittern do zohe er mit grossem gewalt in das Hispanisch meer vnnd funde auß rat vnd lere der ihenen die die gelegenhait der orden vnnd des meers kennen vil vnnd mancherlay innseln von den menschen nye bewonet. Vnder anndern schiffet er in ein innseln des meers von den menschen vnbewonet. aber doch an prunnen befeu^echtet. faysts erdpodems. waldig. zu inwonunng vnnd besitzunng der menschen fu^ogsam. In dieselben innseln schicket er manncherlay geschlecht

---

1. 1491