Die Schedelsche Weltchronik (deutsch):270

269 <<<Vorheriges Blatt	Die Schedelsche Weltchronik Blatt CCLXX	Nächstes Blatt>>> 271

unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

CCLXIX verso:

erobert Bachonem den Pannonischen ko^enig vnd die Amantiner zwischen der Saw vnd Tran bestritten. Aber Traianus der kaiser hat daciam ihenßhalb der Thonaw. die so ein tayl des hungrischen lands ist gezemt vnd auff ein barbarischen erdpodem ein prouintzen gemacht. aber dise prouintz wardt nach verlust vnder Galieno durch aurelianum herwider gebracht. Nach den ro^emern haben yezuzeiten die Huni das Scitisch volck. zu zeiten die gothi auß den innseln des Baltheyschen oder Prewssischen meers. darnach die Sachßen auß Teu^etschem land ziehende Pannoniam bekriegt vnd beseßen. Zu letst hat die hungrisch nation auß den letsten o^ertern der Scithier vberhand genomen bis in disen tag ein ko^enigreich habende vnd ihenßhalb vnd dißhalb der Thonaw weyt herrschende. Nicht verr vom vrsprung des fluss Thanay ist ein anders Hungerland diser hungrischen prouintzen mu^oter an gezu^enge vnd sytten dise Hungrischen prouintzen schier gleich. wiewol dise als ein cristenliche anbetterin burgerlicher vnnd gezogner ist dann ihene die nach grobem Barbarischem sytten lebennde die abgo^etter eret. In Hungern lannd durch das die Thonaw lawft hat kaiser Sigmund. kaisers Karls des vierden sum ein geporner Beheim

CCLXX recto:

des vrsprungs ein Teu^etscher in wanckelm glu^eck vber .l. iar geregirt vnd Elizabethen sein tochter Albrechten dem hertzogen zu o^esterreich zu der ee vermehelt vnd ime alle sein herrschung geschaft (in massen dann hieuor in disem bu^och von ir yedem in seinem tittel das vnd anders nach der leng begriffen stet. deßhalb so^elchs alles hiebey wider zemelden vermyden bleibt) Dieweil der benant Albrecht eins mals zu Ofen was do begabe sich alda ein so^elche geschiht. Der richter der statt Ofen ein teu^etscher man ertrencket einen Hungern von seiner verschuldung wegen das verschmahet den hungern die dann dem teu^etschen namen fast gehessig sinnd gar sere. alßpald erhu^ob sich ein auffru^or also das die Hungern zu der waffen griffen vnd was Teu^etscher ine begegenten allenthalben zu tod schlu^ogen. Es wardt ein flucht zum ko^enig in das schloss. der kawflewt hewßer der die maist anzal teu^etsch was warden zerru^edet. Zu derselben zeit prediget den zu Ofen Jacobus marchianus ein leßmaister parfu^eßer ordenns. an schriftlicher weißheit vnd heilligkeit des lebens beru^embt. der zu stillung vnd vertempfung der auffru^or die pildnus des gekreu^etzigiten hailannds in der hand tragende dem wu^eettenden vnd gewappenten volck entgegen lieff vnd sie zuuermeydung des todschlahens vnd rawbs vnd zu hinlegung der waffen flehlich vermanet. aber sie verstunden seine wort nicht sunder maynten das sie Cristum als einen fu^erer oder anlayter irs fu^ernemens hetten vnd hu^oben denselben Jacobum vnd das crucifix in die ho^ehe entpor auff vnnd tobten durch die statt yetzo diss denn ihenß hawß plu^endrende doch enthielten sie sich vor todschlahen von gegenwertigkeit wegen des benanten bruder Jacobs. der dann allen fleiß fu^erkeret yetzo mit bitte denn mit zehern den grymmen des angezu^endten volcks zesenftigen. Vnlang darnach verschied ko^enig albrecht mit tod vnd ließ Elizabethen sein wittiben also geschwengert. Nw vermaynten die hungern vnzymmlich sein vnd geferlich das ein solch groß ko^enigreich dem gericht vnd herrschung einer frawen vnderligen solt. demnach vermaneten sie mit großem bitten ir Vladislaum den Polnischen ko^enig zu der ee zenemen. also verwilliget sie mit dem geding so sie einen sun gepere dz ime solchs keinen nachtail bringen solte. dem nach warden des ko^enigreichs prelaten vnd fu^ersten von gepurt vnd an glawbwirdigkeit die fo^erdersten gein Poln gesendt. dieweil dieselben vnderwegen warn do wardt Ladislaus geporn zu Stu^olweissenburg getawft. mit der gu^ertel der ritterschaft begabt vnd mit der Hungerischen kron an einem einigen tag bekro^enet. darnach zu kaiser Friderichen gebracht vnd zwelff iar bey ime gehalten mitsambt der kron. die mitsambt dem sun sein mu^oter demselben kaiser Friderichen befolhen het. Die Hungern schickten doch wider der ko^enigin willen ire botschafter gein Poln zu ko^enig Vladislao. den brachten sie durch grosse zusagung vnd verhaissung gein Hungern vnd gru^esseten ine als einen ko^enig mit auffgesetztem dyadem. Als nw die mu^oter Ladislai mit demselben Vladislao in mancherlay gestalt mit waffen lang gezanckt. vnd graff Vlrich von Cili in zwipartheyschkeit der Hungern das ko^enigreich Ladislao zu gu^ot beschu^etzt het do wardt er von den polnischen gefangen vnd langzeit in fangknus gehelliget. Dionisius der ertzbischoff zu gran darnach mit cardinelischer ere begabt von geschlecht vnd an sytten ein durchleu^echtig man hat yedem ko^enig das ko^enigclich dyadem auffgesetzt. einem willig den andern bezwungen. dann wiewol er gefordert auff offne vertro^estung der sicherheit gein Ofen kome so wardt er doch vor nit frey gelassen ee denn er den Vladislaum zu Stu^olweissenburg bekro^enet. Alßpald er aber anhayms kome do vnderstund er sich mit ho^ehstem fleiß dem fu^ernemen der Poln zewiderstreben. Vnd wiewol Julianus der cardinal sancti angeli von babst Eugenio gein Hungern gesendt einen anstal des kriegs zwischen Vladislao vnnd Elizabethen auff ein nemliche zeit machet so kund er doch keinen frid finden. Nach absterben der ko^enigin wendeten sich schier alle des Hungerischen ko^enigreichs fo^erdersten vnd besten an die Poln. allain Gißkra der Beheim gar ein geu^ebter kriegßman hielt sich in Hungern auff des Laßlaws seyten. der dann oft mit wenig volcks ein grosse menig der hungern vnd poln vberwunden. zerstrewt. außgetilgt. vnd zwaymaln Johannem hunianisch mit grossen heeren vmbgeben hat. wagenburg. lose gemacht. Derselb Johannes was ein Walach nit von hoher gepurt aber doch gu^oter anschleg hoher synnschicklichkeit vnnd der tugennt ein liebhaber. vnnd het gegen den Tu^ercken vil glu^ecklicher streyt vnd reichet mit der feind rawb die Hungerischen gotzhewßer. vnnd was der. der erster bey den hungern anzaiget das der Tu^ercken spitzen geprochen vnnd vberwunden werden mo^echten. Auß disen dingen wardt Vladislaus geraytzt mit amurate dem Tu^erckischen kaiser auch einen streyt fu^erzenemen. Zwischen kaiser Friderichen vnd Vladislaum der sich einen Hungrischen ko^enig nennet wardt durch Julianum den cardinal ein pu^entnus vnnd vertrag gemacht dermaßen vnnd mit solcher beschaidenhait. das der kaiser die Hungern wo sie in o^esterreich oder Steyer einicherlay schadens tetten straffen mo^echt. deßgleichen mo^echt auch Vladislaus gegen des kaisers vnderthanen thun die das Hungerisch land beschedigten. Ein stettlein Gu^ontz genannt in Hungern an Steyer vnd o^esterreich stossende hielten die rawber innen mitsambt ettlichen darumb gelegnen casteln auß denselben rayseten sie gein o^esterreich. von dannen fu^eereten sie vil vihs vnd menschen hyn. der kaiser Friderich samlet