Die Schedelsche Weltchronik (deutsch):268

267 <<<Vorheriges Blatt	Die Schedelsche Weltchronik Blatt CCLXVIII	Nächstes Blatt>>> 269

korrigiert	Dieser Text wurde anhand der angegebenen Quelle einmal Korrektur gelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.

CCLXVII verso:

DIe alten geschihtbschreiber haben gar wenig von Teu^etschen landen. als ob dieselb nation außerhalb des vmbkrayss lege geschriben vnd als trawmsweise von teu^etschen sachen meldung gethan. dann so wir von alten zeitten lesen so finden wir das die Teu^etschen ettwen in Barbarischem grobem sytten gelebt. sich zerrißner schno^eder klaydunng gepraucht. vnnd des gefengs des willprets vnnd des feldgepews generet haben. frayssam vnd kriegs begierig menschen. aber golds mangelhaftig vnd keins weins gepreu^echig. Teu^etsch land zu latein germania genant wardt ettwen innerhalb dem meer vnd der Thonaw. vnd widerumb innerhalb dem Rhein vnd dem fluss Albis oder Elb begriffen. Wie verre aber die teu^etschen nwmaln ire grenitz vbertretten haben das ist vnuerborgen. wann dess ist schier mer das sie in gallia. im o^ebern ryeß im Norgkew. im Lechfeld. vnnd in Polnischer art erobert denn dess das sie vormals inngehabt haben. Wenn wir der edeln hohberu^embten vnd scheinpern stett. der reichen gotßhewßer. der großmechtigen gewaltigen fu^ersten vnd prelaten Teu^etscher nation gedencken wo^ellen so sehen wir kein land das in achtung aller ding teu^etschs land vbertreffe. also wenn einer auß den teu^etschen der zu den zeitten des kaisers Julij gelebt het erstu^ende vnd teu^etsch land durchwanderet (als Arioiustus) so sprech er das es nit die erden wer die er ettwen gesehen het vnd kennet es nicht fu^er sein vaterland. So er die besetzung vnd pflantzung der weingarten vnd fruchttragender pawmen. die beklaydung der menschen. die ho^eflichkeit vnd hu^ebschsytlichkeit der burger. die scheinperlichkeit der stett. vnd ein solche zierlichkeit der pollicey vnd gemaynes regiments bey den Teu^etschen schawet. Aber dise verwandlung ist durch nichtz anders denn durch annemunng cristenlichs glawbens beschehen. dann der cristenlich glawb hat von den Teu^etschen alle barbarische grobheyt vertriben vnd die Teu^etschen also gehu^ebscht das yetzo die kriechischen grob vnd die Teu^etschen billich lateinisch genent werden. So man nw newe ding betrachtet. oder alte ding herwider bedenckt so erscheint vnder allen nationen die zum krieg geschickt sind keine erfarner. keine hytziger denn die Teu^etsch. dann in diser teu^etschen nation wreden gefunden pferd. waffen vnd gelt. auch souil durchleu^echtiger fu^ersten. souil hohgeporns adels. souil starcker rewtter vnd hoflewt. souil mechtiger stett. souil reichthu^emer. souil golds. souil silbers. souil eysen ertze. so grosse menig volcks. so grosse manschaft. so große ku^enmu^eetigkeit. so große kraft vnnd stercke. Vnnd wiewol ettwen die grenitz o^erter vnnd ende teu^etschs lannds. nemlich (als die alten setzen) vom orient der fluss weichsel. vom nyderganng oder occident der Rhein. von mittemtag die Thonaw. von mitternacht das Peru^osisch meer gewest sinnd. yedoch sehen wir yetzo wie weyt sich die Teu^etsche nation erpraytet hat. dann die teu^etschen haben Engelland nach außtreibung der Brittannier erobert. vnd der nyderlender vnnd Schweytzer oder Elsasser gegennt nach außwerffung der Gallier oder Frantzosen erlangt. vnd das o^eber rieß vnd Norgkew verfolgt vnd den fu^oß bis in welsche land gestreckt. Die Teu^etschen haben auch das volck Hulmigeros yetzo Preu^eßen genant auß der vnglawbigen gewalt gezogen. Allain die Beheim als die frembden sitzen in teu^etschem ertreich. ein mechtigs hoh edels volck. aber sie sprechen das sie dem Teu^etschen kaiserthumb gehorsam seyen. Ir ko^enig ist auß des reichs kurfu^ersten der fu^ernembst. Die teu^etschen sind groß. starck. streytper vnd auch got angeneme lewt. die ire land vnd nation also erweytert. vnd ob allen vo^elckern dem ro^emischen gewalt vnd mechtigkeit widerstand gethan haben. dann wiewol der nydertretter aller erden vnnd der zemer des vmbkrays der werlt Julius der kayser nach verdruckung vnd bestreytung der Gallier vnd Franckreichischer gegent zu mermaln vber den Rhein gerayset vnd große ding in teu^etschem land begangen hat. yedoch hat er das streitper fraydig vnnd festmu^eetig Schwebisch volck vngezemt vnnd vnuergeweltigt mu^eessen lassen. Augustus octauianus der ob allen ro^emischen kaisern der glu^egklichst vnd werltseligst gehalten ward. dem auch die ko^enig Parthier vnd indier schanck vnd gabe sendeten ist nyndert ye in streyt ernider gelegen dann allain gegen den teu^etschen. Es wer zelang hie zebeschreiben was vnfu^og. beschwerde vnd verdriess die Teu^etschen den ro^emern haben bewest. dann wiewol die teu^etschen ye beweyln dem ro^emischen glu^eck gewichen haben so haben sie doch darnach die ro^emer. die Gallier. die Frontzosen. die Hispanier. die Hungern vnd andere mancherlay vo^eckere offtmal bestritten vnd syglich vberwunden. Die ro^emer haben auch nach erobrung irs gewalts grosse ding geu^ebt nit on hilff vnd beystand der teu^etschen. die in kriegs sachen also fast tu^eglich. vnd in haymischen henndeln also glawbhaftig vnd getrew erschynen dz sie zu hu^etern vnd bewarern des kaiserlichen leibs vnd lebens vor menigclichen erkorn vnd außerlesen warden. Wir wißen auch dz hertzog Gotfrid zu lothringen

CCLXVIII recto:

allain mit dem Rheinischen teu^etschen vnd ettlichen Galliern vnd wenig Walhen das Hungerisch land geschlagen[.] Kriechisch land durchdrungen. Hellespontum durchzogen. Asiam durchrayset. Jherusalem auß der vnglawbigen gewalt erledigt vnnd alle vo^elcker vnderwegen ernidergelegt hat. wiewol die Tu^ercken vnnd Sarraceni sich in großer zal vnderstunden zewiderstreben. In seinem heer sollen zwaymal hunderttawsent streitper man gewesen sein aber teu^etschs lannd allain vermag gar vil mer volcks zesammen zebringen. dann bey herrschung ko^enig Cunrats des schwaben als babst Eugenius die cristen wider die Sarracen zu hilff vnnd rettung des heilligen lands anraytzet vnnd nw die Preu^eßen mit andern hinhinter gelegnen vo^elckern die abgo^etter ereten. vnnd die Sachßen oder andere ire nachpawrn als cristen vilfeltigclich vbezohen do ließ ko^enig Cunrat die Sachßen oder andere ire nachpawrn dahaymend sich der preu^eßen vnd andrer vnglawbigen auffzehalten vnd zohe er mit den Rheinlendischen Schwaben Francken vnd Bayern gein Jherusalem. Wielang aber vnd wie prayt. wie gotßdienstlich. wie warhaftig. wie gerecht. wie gelu^eebdhaltende. wie volckreich. wie habehaftig die Teu^etsch nation sey. wie großer adel[.] wie starck. vnnd der ritterschaft geu^ebt vnd erfaren. wie große zierd der kirchen. wie große ere vnd ru^om der pfafheit. Wieuil großtetigkeit der fu^ersten. wie großer schein vnd glantz der stett. was amplicks des himels. was fruchtperkeit der erden. vnd was zierlichkeit der lender vnd gegent alda erscheynen das mu^ogen wir vns ee verwundern denn das alles erzelen. Wann aber nw dises werck des bu^ochs der historien genannt in der kaiserlichen reichßstatt Nu^ermberg außgeet. welche statt schier in dem mittel Teu^etschs lannds gelegen ist so wollen wir in beschlu^oss diss bu^ochs von Teu^etschem land ein wenig meldung thun vnd damit die historien Enee siluii babsts Pii des andern von europa vnd den geschihten sich bey zeiten kaiser Friderichs des dritten darinn begeben. gemacht ku^ertzlich einziehen doch nicht allenthalben gantz gemess der maynung des lateins darauß es genomen ist sunder zu zeiten mit fu^ergeung ettlicher wort vnd maynung. auß vrsachen das an ettwieuil enden in der bemelten Eneischen histori meldung vnnd beschreibung beschiht von dingen dauon hieuor in disem bu^och erklerung beschehen ist. Zu sambt dem auch das Teu^etsch alles in dem spacio das zu dem Teu^etschen nit weitter denn zu dem latein gelassen ist nicht hat mu^ogen begriffen werden.