Das vierd alter
Azarias der sun Obeth ein prophet diser zeit scheinende hat von der gefencknus geweissagt. Diser Azarias gieng Aza dem koenig iuda entgegen vnd der koenig wardt in des propheten worten gesterckt vnd also vermanet dz er die abgoetter von aller erden iuda vnd beniamin abtete.
Sambri der koenig israhel vertilget dz haws baasa vnd ine hat Amri pald geslagen vnd fuer ine geregirt.
Helias der prophet erlanget mit seinem gepet das es in vierdhalb iarn nit regnet auff die erden vnd er ward bey dem fluss Carith von eim raben generet der ime prot vnnd fleisch fruee vnd spat zubracht. der von der wittben von sarepta die noch ein wenig melbs het dz doch nit abname generet wardt: vnd er iren sun vom tod erwecket. der auch vor dem versammelten volck israhel auff dem berg Carmeli das feueer von himel auff dz opffer absteigen tet. dz doch iiijc. briester der abgoetter nit thun mochten die er hieß toedten. darumb verfolgte ine Ihesabel allenthalben do wandert er in die wuestnus. vnd der engel erschine im schlaffen dem vnder einer wachhalter stauden ine auffweckende vnd vermanente zeeßen dz ascherein prot das er ime gebracht het. in des stercke er. xl. tag wandert biß auff den berg oreb. von dannen kome er in Damascum. Darnach wardt er von dem herren durch einen sturmwind in den himel gezucket.
Abdyas einer auß den. xij. propheten soll ein schaffer oder außgeber der haws achabs des konigs israhel. do nw der konig Ihesabel achabs weib. die propheten des herren toedtet. do verparg er auß inen. l. vnnd. l. in den gruoben vnd darumb verdienet er den geist der weissagunge.
Achab der. vi. konig israhel hat vber alle die. die vor ime waren boeslich gehandelt. aliermeist auß rat vnd eingeplasung der allerboeste Iesabel seins weibs. der wardt zu letst im streit mit geschoß verwundt vnd starb. nw wz Ihesabel des koenigs Sydoniorum tochter vnd ein zaichen aller boßheit. die ertoedtet den Naboth vnd die propheten des herren. vnd sie wardt durch Hieu auch ertoedtet vnd von den hunden gefreßen.
Micheas der prophet auß dem geslecht Ephrem hat den Achab in seinen suenden offt gestraffet vnd ime verkuendet das er sterben wuerd. Also wardt er imm streyt wider den konig Sirie auff einem wagen allein sitzende zu tod geschoßen.
Ochosias der sibend konig israhel sendet zu beelcebub den mugken got Acharon ime zesagen ob er moecht gesundt werden. darumb starb er als im Helias geweissagt het. Er fienge an zeregirnn imm. xvij. iar Josaphat des koenigs iude vnd ist erloschen an einichen sun. vnnd Joram sein bruder volget im nach imm koenigreich.
Ionas ein sun Amathi ein leuechtender prophet geachtet hat vil ding die hie nit beschriben sind geweissagt. Der wardt darnach gein Niniue geschickt. als in seinem buoch begriffen ist. Diser Jonas sol (als man sagt) dieweil er noch ein kint gewesen sey durch Helyam vom todt erweckt worden sein. Diser vomm walfisch verschlickter Jonas hat das leyden cristi fuerbedeuetet mit seiner geferlichen meerfart.
Ioram wardt von Benedab in Samaria belegert. vnd doch mit den verdiensten Helisey erledigt. aber er fieng an zeregirnn imm. xviij. iar des koenigs iosaphat an stat seins bruders ochosie. nach dem er aber der suende Iheroboams nachgefolgt hat ist er erslagen worden mit allem haws seins vaters von Hieu. wiewol er ettwieuil iar sich der behaltung der gepot gotes vnd zimlicher herrschung vber die seinen gepraucht. vnd Heliseum den propheten in eren vnnd wirden gehabt. der Moabiten konig bestritten sein stett vmbgekert vnd allen rawb der veind erfolgt hat.
|