Des meien zit vnd al sin schoͤne

Des meien zit vnd al sin schoͤne·
ist aber komen·
vnd die liehten svmertage so heiter vnd so lang·
die vogel singent svͤsse doͤne·
ich han vernomen·
von der lieben nahtegal ir wunneklichen sang·
si froͤit sich das heide vnd walt·
stent in wunneklicher schǒwe·
so froͤiwe ich mich dc min frowe·
ist alse wol gestalt·

Ahý wer dc an minem heile·
vnd solte es sin·
dc mir von der minneklichen wurde ein vmbevang·
also dc si mir wurde zetaile·
dú frowe min·
so were almin leit da hin· min sorge wurde krank·
vil svͤsse minne dv́ fuͤge das·
bring mich der lieben alse nahe·
so dc si mich niht vsmahe
sost mir deste bas·

Ane allen wandel ist min frowe·
ein selig wib·
vnd so reht wol gestalt da ist niender breste bi·
minne gib dc ich beschǒwe
ir werden lib·
so wurde ich vil sender man schiere aller sorgen vri·
ir mv́ndelin dc ist rosenvar·
ir wengel wis vnd rot dar vnder·
an ir lit schoͤne ein grôs wunder·
sist mir lieb dest war·