Der ſvmer mit gewalde hat

Der ſvmer mit gewalde hat·
bekleidet walt vn̄ ǒwe·
der anger wol geblvͤmet ſtat·
in ſvͤſſem meientǒwe·
dú heide bꝛeit·
hat gruͤnu^{[WS 1]} kleit·
an ſich geleit·
iſt mir geſeit·
ī wūneklich̾ ſchowe·
Min frowe iſt gv̊t·
ſwie ſi doch tůt·
mich vngemv̊t·

Min vngemv̊te iſt gar ze gros·
als ich úch wil beſcheidē·
ich ſten ir heile leider blos^{[WS 2]}·
dú mich in ſenden leiden·
mit froͤmder tat·
an allen rat·
ſwies mir ergat·
nv lange lat·
als einē wildē heidē·
Min frowe iſt gv̊t·
ſwie ſi doch tůt·
mich vngemv̊t·^{[WS 3]}

Ich lobe ir kúſche vn̄ ǒch ir lip·
ir ſchoͤne vn̄ ir gebaren·
in geſach nie mīneklich̾ wib·
bi allen minē iaren·
ſwie dc mich nie
ir lob v̾uie·
doch ſang ich ie
doꝛt vn̄ hie·
ſwa ie die beſten waren·
Min frowe iſt gv̊t·
ſwie ſi doch tůt·
mich vngemv̊t·^{[WS 4]}

Sol ich niht herzelieb beiagē·
noch hohe froͤide erw̾ben·
ſo mac ich doch vō ſchuldē klagen·
vn̄ mv̊s vō leide erſterben·
kvmt ir gerich·
ſo grīmeklich·
als vber mich·
ſo ſcham ſi ſich·
ſol ich alſvs v̾derben·
Min frowe iſt gv̊t·
ſwie ſi doch tůt·
mich vngemv̊t·^{[WS 5]}

Mich bant ir liehter ǒgen blik·
vnde wil mich niht enbinden·
ich wāt mich in ir minneſtrik·
vn̄ kan mich niht entwindē·
ſvs wart ich wunt
zer ſelben ſtvnt·
heý roter mvnt·
nv tv̊ mir kvnt·
ſúl ich genade vinden·
Min frowe iſt gv̊t·
ſwie ſi doch tůt·
mich vngemv̊t·^{[WS 6]}

Anmerkungen (Wikisource)

1. Vorlage: gruͤne.
2. Vorlage: blv̊s.
3. Vorlage: Min frowe iſt gv̊t·
4. Vorlage: Min frowe iſt gv̊t·
5. Vorlage: Min frowe·
6. Vorlage: Min fro·