Deſt ein not das mich ein man

Deſt ein not das mich ein man·
voꝛ al d̾ w̾lte twinget ſwes er wil·
ſol ich deſ ich niht enkan·
beginnen dc iſt mir ein ſweres ſpil·
ich hat ie vil ſtetē mv̊t·
nv mv̊s ich lebē als ein wib dv́ mīnet vn̄ das angeſtlichen tůt·

Der min hůte des were zit·
ê dc ich iht getête wider in·
wolt er lâſſē nv den ſtrit·
wes gert er mêre wan dc ich im hoͤlder bin·
danne in al der w̾lte ein wib·
nv wil er das iſt mir ein not dc ich dvrh in die ere wâge vn̄ ǒch dē lib·
Des er mich nv niht erlât·
dc tv̊n ich vn̄ tete ſin gerne vil·
wand es mir vmb in ſo ſtât·
dc ich ſin niht ze frúnde enbern wil·
ein alſo ſchone redend̾ man·
wie moͤhte ein wib dem iht v̾ſagē· der ǒch ſo tvgentliche lebt als er wol kan·

Schone kan er im die ſtat·
gefuͤgē daſ er ſpꝛichet wider mich·
zeinē ziten er mich bât·
dc ich ſinē dieneſt nême dc tet ich·
do wânde ich deſ ich tete wol·
done wîſte ich niht dc ſich da hv̊b ein ſw̾e dú lange an minem libe weſen ſol·

Mines todes wande ich bas·
dāne daſ er gewaltig iem̾ wurde min·
we warvmbe ſpꝛiche ich dc·
ia zúrne ich ane not es ſolte eht ſin·
dike hat ich im verſaget·
do tet er als ein ſelig man der ſinē kvmb̾ alles vf genade klaget·