Das beste das ie man gesprach

Textdaten
Autor: Reinmar der Alte
Illustrator: {{{ILLUSTRATOR}}}
Titel: Das beste das ie man gesprach
Untertitel:
aus: UB Heidelberg 100r
Herausgeber:
Auflage:
Entstehungsdatum: 12. Jahrhundert
Erscheinungsdatum: Vorlage:none
Verlag: Vorlage:none
Drucker: {{{DRUCKER}}}
Erscheinungsort:
Übersetzer:
Originaltitel:
Originalsubtitel:
Originalherkunft:
Quelle: UB Heidelberg
Kurzbeschreibung:
Mit aufgelösten Lettern. Vergleiche auch Das beſte das ie man geſpꝛach in Originallettern.
Wikipedia-logo-v2.svg Artikel in der Wikipedia
Eintrag in der GND: {{{GND}}}
Bild
[[Bild:|250px]]
Bearbeitungsstand
korrigiert
Dieser Text wurde anhand der angegebenen Quelle einmal Korrektur gelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.
Um eine Seite zu bearbeiten, brauchst du nur auf die entsprechende [Seitenzahl] zu klicken. Weitere Informationen findest du hier: Hilfe
[[index:|Indexseite]]

[100r]

Das beste das ie man gesprach·
oder iemer me getůt·
dc hat mich gemachet rehtelos·
got weis wol sit ich si erst gesach·
so het ich ie den mv̊t·
dc ich fúr si nie dehein wib erkos·
kvnde ich mich daran haben gewendet·
da man es dike erbot·
minem libe rehte als ich wolte·
ich hete eteswas volendet·
ich ruͤme mich an not·
der wibe mere danne ich solte·
war sint komen die sinne min·
sol es mir wol erbotten sin·
han ich tvmber gǒch so veriehen·
swas des war ist dc mv̊s noch geschehen·

Min rede ist also nahe komen·
dc si erste vraget des·
was genaden si der ich da ger·
wil si des nv niht haben vernomen·
so nimet mich wunder wes·
ich so maniger swere niht enber·
dú mir also dike nahen·
an dem herzen sint·
dc ich iemer tac vro belibe·
sol mich der kvmber niht vernahen·
tete es danne ein kint·
dc sich iemer lieber nach dem wibe·
dem wolte ich wol wîssen dc·
moͤht ich mich noch bedenken bas·
vnd neme von mir gar den mv̊t·
neina herre io ist si doch so rehte gv̊t·

Het ich der gv̊ten ie gelogen·
so gros als vmbe ein har·
so lide ich von schulden vngemach·
ich weis wol was mich hat betrogen·
da seit ich ir ze gar·
alles das mir ie von ir geschach·
vnd erbot mich ir ze sere·
do si dc vernam·
dc ich von ir niht komen kvnde·
sit was si mir iemer mere·
in ir herzen gram·
vnd erbot mir leit zallen stvnde
also han ich si verlorn·
nv wil si dest ein núwer zorn·
dc ich si der rede gar begebe·
weisgot niemer al die wile ich lebe·

Wie dike ich in den sorgen doch·
des morgens bin betaget·
so es alles slief das bi mir lac·
die enwessen noch enwissent noch·
was mich min herze iaget·
dar es vnsanfte komen mac·
wan si enlat mich von ir scheiden·
noh bi ir bestên·
ie dar vnder mv̊s ich verderben·
mit den listen wene ich beiden
wil si mich vergen·
hoͤrent wunder kan si also werben·
nein si weisgot sine kan·
ich han si ein teil gelogen an·
si getet es nie wan dvr das·
dc si mich wil versv̊chen bas·

Do liebe kom vnd mich bestůnt·
wie tet genade so·
dc si es niht genedeklichen schiet·
ich bat si reht als alle tv̊nt·
die gerne weren fro·
wand ir trost vil manigen ie beriet·
dc si ǒch mir dc selbe tete·
inrethalp der túr·
hat si leider sich verborgen·
mac si sehen an mine stête·
vnd gebe dvr got her fúr
helfe dc ich kom vs sorgen·
wan ich kan mit schoͤnen sitten
so kumberlichen her gebitte·
ob des dú liebe niht verstât·
so we gewaltes dens an mir begat·