Am Bächle

Am Bächle.
 im September 1879

S Bächle schwätzt im Busch verborga
Und as sait: „Heazbruder, lach
Au mit miar, wirf deini Sorga
Keackle zuamer rei’ in Bach.

5

Wött i ällas äschtamiara,

Windla oder Schlotzerbleatz,
Glei da’n Appatit verliara,
Brüaderle, nôch wär as leatz.^[1]

Richt mer au a reacht verheiter^[2]

10

Bour sei’ Güll^[3] ins Bettle nei’,

Lauf i denischt^[4] luschtig weiter,
Wear vom sealbar wieder rei’.
 
Oder wenn a môl a Gearber
Seine kirri^[5] Kogahäut^[6]

15

In mi hängt und druff der Färber

Nôch sei’ Giftbrüah in me keit,

Sott i dô dahinta bleiba
Und verzürnt in Winkel stauh’,
S Bläterle^[7] dött zema kleiba^[8]

20

Und koi’ Tröpfle von mer lau’?

Bruadar, laß du deine Sorga,
Ischt au heu’t a Reagatag,
Scheint doch wieder moanamorga^[9]
D Sonna über Busch und Hag.

25

Älles lôht se überwinda,

Nu’ da Kopf äll oba trait!
Glaubs, du weasch in kuzem finda,
S Bächle hä der d Wôhret gsait.“

---

1. Gefehlt.
2. Verschlagener, boshafter.
3. Jauche.
4. Dennoch.
5. Ekelhaft.
6. Häute toter Tiere.
7. Blase.
8. Zusammenklemmen.
9. Am Morgen des morgigen Tags.