Agatha, an der Bahre des Pathen

Agatha,

an der Bahre des Pathen.

Chumm Agethli, und förcht der nit,
i merk scho, was de sage witt.^[1]
Chumm, b’schau di Götti no ne mol,
und brieg nit so, es isch em wohl.

5

     Er lit so still und fründli do,

me meint, er los, und hör mi no,
er lächlet frei, o Jesis Gott,
as wenn er näumis sage wott.

     Er het e schweri Chranket gha.

10

Er seit: „Es griift mi nümmen a!

der Tod het iez mi Wunsch erfüllt
und het mi hitzig Fieber gstillt.“

     Er hat au menge Chummer gha.
Er seit: „Es ficht mi nümmen a,

15

und wienes goht, und was es git,

im Chilchhof niede höris nit.“

     Er het e böse Nochber gha.
Er seit: „I denk em nümme dra,
und was em fehlt, das tröst en Gott

20

und gebem au e sanfte Tod.“

     Er het au sini Fehler gha.
’s macht nüt! Mer denke nümme dra.
Er seit: „I bi iez frei dervo,
’s isch nie us bösem Herze cho.“

25

     Er schloft, und luegt di nümmen a,

und het so gern si Gotte gha.

Er seit: „Wills Gott, mer werde scho^[2]
im Himmel wieder z’semme cho!“

     Gang, Agethli, und denk mer dra!

30

De hesch e brave Götti g’ha.

Gang, Agethli, und halt di wohl!
Di Stündli schlacht der au ne mol.^[3]

---

1. Im alsatischen Taschenbuch von 1807, wo dieses Gedicht zum erstenmal erschien, heißt es:
   i merk wohl an der, was de witt.
2. Im alsat. Taschenbuch von 1807:
   er seit: s’macht nüt, mer werde scho,
3. Ebendaselbst:
   Gang, Agethli, vergiß mer’s nit,
   und wies der goht, verzag mer nit.
   Gang, Agethli, und halti wohl,
   Di Glöckli lütet au ne mol.