Ach der ich ob allen frowen

Ach der ich ob allen frowen·
vf mins endes zil·
dienen wil·
dú hat ane schvlde verhowen·
mich sere vf den tot·
ach der not·
Ach vf genade swie si mir tv̊t·
habe ich mv̊t·
gv̊t· lib vnd leben·
ir ergeben·

Ich wolt ir mit rede bescheiden·
wc ich herzeklage·
von ir trage·
si tet als ich were ein heiden·
ach min froͤide seig·
ich gesweig·
Ach vf genade swie si mir tv̊t·
habe ich mv̊t·
gv̊t· lib vnd leben·
ir ergeben·^{[WS 1]}

Sit min frowe die ich kroͤne·
rede mir senden man·
niht engan·
minen kvmber ich ir doͤne·
swar ich landes var·
offenbar·
Ach vf genade swie si mir tv̊t·
habe ich mv̊t·
gv̊t· lib vnd leben·
ir ergeben·^{[WS 2]}

Ir vil spiegel liehten ǒgen·
hant verseret mich·
herzeklich·
ich mv̊s sterben· svnder lǒgen·
ach ir mv́ndel rot·
tv̊t mih tot·
Ach vf genade swie si mir tv̊t·
habe ich mv̊t·
gv̊t· lib vnd leben·
ir ergeben·^{[WS 3]}

Swie si mit gewalt mich twinge·
mih kan wenden niht·
kein geschiht·
ich mv̊s iemer vf gedinge·
sin ir eigen kneht
das ist sleht·
Ach vf genade swie si mir tv̊t·
habe ich mv̊t·
gv̊t· lib vnd leben·
ir ergeben·^{[WS 4]}

Anmerkungen (Wikisource)

1. Vorlage: Ach vf genade·
2. Vorlage: Ach vf genade·
3. Vorlage: Ach vf genade·
4. Vorlage: Ach vf genade·