Ach der ich ob allē frowē

Ach der ich ob allē frowē·
vf minſ endes zil·
dienen wil·
dú hat ane ſchvlde v̾howen·
mich ſere vf den tot·
ach der not·
Ach vf genade ſwie ſi mir tv̊t·
habe ich mv̊t·
gv̊t· lib vn̄ lebē·
ir ergeben·

Ich wolt ir mit rede beſcheidē·
wc ich herzeklage·
vō ir trage·
ſi tet als ich w̾e ein heiden·
ach min froͤide ſeig·
ich geſweig·
Ach vf genade ſwie ſi mir tv̊t·
habe ich mv̊t·
gv̊t· lib vn̄ lebē·
ir ergeben·^{[WS 1]}

Sit min frowe die ich kroͤne·
rede mir ſenden man·
niht engan·
minen kvmber ich ir doͤne·
ſwar ich landes var·
offenbar·
Ach vf genade ſwie ſi mir tv̊t·
habe ich mv̊t·
gv̊t· lib vn̄ lebē·
ir ergeben·^{[WS 2]}

Ir vil ſpiegel liehten ǒgen·
hant v̾ſeret mich·
herzeklich·
ich mv̊s ſterbē· ſvnder lǒgen·
ach ir mv́ndel rot·
tv̊t mih tot·
Ach vf genade ſwie ſi mir tv̊t·
habe ich mv̊t·
gv̊t· lib vn̄ lebē·
ir ergeben·^{[WS 3]}

Swie ſi mit gewalt mich twinge·
mih kan wenden niht·
kein geſchiht·
ich mv̊s iemer vf gedinge·
ſin ir eigē kneht
das iſt ſleht·
Ach vf genade ſwie ſi mir tv̊t·
habe ich mv̊t·
gv̊t· lib vn̄ lebē·
ir ergeben·^{[WS 4]}

Anmerkungen (Wikisource)

1. Vorlage: Ach vf genade·
2. Vorlage: Ach vf genade·
3. Vorlage: Ach vf genade·
4. Vorlage: Ach vf genade·