Schreit vnd such ohne auffhörn /
Den Böhmisch König mit beschwern /
Der sich von Prag gantz abgewandt /
Als er die Schlacht[1] verlohr im Land /
Wer sagt mir doch: Wo ist er hin /
Der verlohren Palatin[2]? /
A.[3] Ihr Soldaten die jhr damal /
Deß Keysers Macht entwichet all /
Ihr seyt mit all verscharrt weiß ich /
Darumb bitt ich / berichtet mich /
Wisset jhr nit / wo ist kommen hin /
Der verlohren Palatin?
B. Hört jhr Bürger in der statt Prag /
Macht nur ein end an euwer Klag /
Die Ungarn[4] all ersoffen sind /
Als sie außrissen so geschwind[5] /
Drumb sagt ihr / wo ist doch hin /
Der verlohren Palatin?
C. Sagt auch an jr betrübten Bawren /
Die jr habt weder wäll noch Mauren /
Vnd habt gesehn der Böhmen schar /
Versincken in den Letten gar /
Berichtet mich / wo ist doch hin /
Der verlohren Palatin?
D. Bethlehem Gabor[6] der Pfaltz verwand /
Euch ist sein Unfall wol bekandt /
Wißt auch vmb seine sachen all /
Berichtet mich doch dieses mal /
Wo mag doch nur sein kommen hin /
Der verlohren Palatin?
E. Ihr lieben Teutschen in gemein /
Es wirdt euch auch wol wissend seyn /
Vor Prag die Böhmisch Niderlag /
Denn vnter euch hört man grosse klag /
|
Wisset jhr nicht / wo ist doch hin /
Der verlohren Palatin?
F. Ihr Kauffleut kompt auß ferrnem land /
Euch ist offtmal vil neuwes bekandt /
Hat man nicht etwan mit verlangen /
In Engelland bottschafft empfangen /
Daß daselbst sey kommen eyn /
Der verlohren Palatin?
Alle die jhr kompt auß Franckreich /
Oder auß andern orten gleich /
Habt jhr nicht etwan da vernommen /
Wo doch nur möchte hin seyn kommen /
Der verlohren Palatin /
Der in Böhmen holt kein gewinn:
G. Ihr Hänsestätt mercket mich recht /
Denn mein anbringen ist nit schlecht /
Weil die Fortuna vertrieben hat /
Den König von Prag auß der statt /
So saget mir / wo ist doch hin /
Der verlohren Palatin.
Ihr Landfahrer euch red ich an /
Ob jhr nit habt gehört etwan /
In ferrnen Landen hin vnd her /
Ob nicht jrgendt vorhanden wer /
Der verlohren Palatin /
Wo mag er doch seyn kommen hin?
Ihr Wechßler / vnd jr Juden all /
Die jhr offt viel erfahrt zu mal /
Bekümmert euch nur vmb die Leut /
Die euch was bringen von der Beut /
Sagt mir / wo ist doch kommen hin /
Der verlohren Palatin?
H. Ihr reformirte Predicanten /
Ihr Heydelbergische Angewandten /
|
Ist jrgendt bey euch gekehrt eyn /
Euwer Landherr: / es wer gar fein /
Denn ich frag nur / wo doch ist hin /
Der verlohren Palatin?
Ihr Wirth / jhr Haußknecht vberall /
Berichtet jhr mich doch einmal /
Ist etwan bey euch eyngekehrt /
Vnd hat Herberg von euch begert /
Der verlohren Palatin /
Oder wo ist er doch hin?
Mein Hänßle der du bey der Nacht /
In der Stattgassen helst die Wacht /
Ist dir nicht jrgendt auch bekandt /
Der Zustandt in dem Böhmerland /
Sag du mir doch / wo ist nur hin /
Der verlohren Palatin?
I. Ich bin deß suchens müd jetzundt /
Thu mir jemands die Warheit kund /
Bucquoy[7] vnd Spinola[8] fürwar /
Werdens wol belohnen par /
Wenn jhr sagt / wo sey kommen hin /
Der verlohren Palatin.
Wolan freuwt euch / ich hab vernommen /
Er ist bey Lüneburg hin kommen /
Im kalten Wetter ist ein schmertz /
Mich erbarmet sein / sag ich on schertz /
Aber er kompt noch wol an Rhein /
Wenn er sich nur eynstellet fein.
E N D E
|
