Ze dieneſt ir von der ich han

ZE dieneſt ir von der ich han·
ein leben mit ringem mv̊te·
als ich nv lange han getan·
vn̄ gan es mir dú gv̊te·

dú mir tůt das herze min·
uil menger ſoꝛgē lere·
ſo wirt an mime ſange ſchin·
dir winter noch dehein ſwere·

Ich wil ſi flehen vntz ich lebe·
dc ſi mir froͤide gvnne·
vn̄ ſi mir lon nach heile gebe·
ſi iſt min ſvmerwūne·

Si feiget blv̊men vn̄ kle·
in mines h̾zen anger·
des mv̊s ich ſin ſwies mir erge·
vil richer froͤiden ſwanger·

Jr gvͤte mich vil lútzel lat·
dekeinen kvmber mvͤgen·
alſam der heiſſe ſvnne tůt·
der ſchin der von ir ougen gat·
der tůt mich ſchone blvͤgen·

alſam der heiſſe ſvnne tv̊t·
die bǒme in dem tǒwe·
ſvs ſenftet mir den ſweren mv̊t·
vō tage ze tage min frǒwe·

Jr ſchoner grůs ir milter ſegē·
mit eime ſenften nigen·
dc tv̊t mir ein meigen regen·
rehte an dc herze ſigen·

Des iſt mir ſanfter danne bas·
e mich v̾bere ſehent dc·
ich trůge e alder w̾lte has·

Er mv̊get ſich ſwer mirs erban·
ich ſi ir nie ſo froͤmde man·
ich erdꝛinge ir mere lones an·

Sol ich dekeine wile lebē·
mir wirt vō ir vil lihte geben·
darnach ein keiſer moͤhte ſtreben·

Dc ſi mir vnderwilen tv̊t·
dc dvhte ein andern man vil gv̊t·
wan dc doch hoher wil min mv̊t·

dem ich geziehen niênen mag·
nv fúrhte ich eht der minnē ſlag·
ich erkennē nv vil mangen tac·

er tv̊t mir leides dike vil·
doh w̾e ich gerne hin an dc zil·
da ſi da ſol vn̄ lonē wil·

Nv wol hin es mv̊s eht ſin·
vn̄ ſtige vf dc herze min·
ich wene ich iht engelt din·
Swenne ir zerehte wirdet ſchin·
dc ich lide diſen pin·
vō diner kvr vn̄ diner bete·
Vn̄ îe mit zúhtē ſchone tet·
An wider wanc·
ſit mich erranc·
ir mīnē ſwāc·
in ir getwanc·
nv iſt ze lanc·
ir habedanc·
dc tv̊t mich kranc·
des han ich mēgen vngedanc·
dc lenget mir die kurzen tage·
vn̄ nv́wet mir die altē klage·
vō der ich wande ſin erloſt·
nv wil ich noch ir genaden troſt·

beitē als ich han getan·
ze heile mv̊ſſe es mir ergan·
in enwil ir niemer abe geſtan·
doch troͤſtet mich min tvmber wan·
ein gůt gedinge den ich han·
zer tvgenden der ſi vil begat·
dc ſi mich lihte niht enlat·
vs ir gewalt·
diſen winter kalt·
ſo iſt beſtalt·
ich wurdes alt·
vn̄ ſoꝛgē balt·
vn̄ doch v̾ſalt·
ze manicvalt·
vn̄ w̾e v̾loꝛn ſwaſ es noch galt·
Dc ſwachte ſere minē mv̊t·
nv růche ich ſwc ſi mir getv̊t·
ſo lâſſe ich niemer minen ſtrit·
wc ob ſi in ſcheidet an der zit·

Si ſol es lan·
vnderſtan·
mit eteſlichen dingē·
dc iſt min rat·
Als es mir ſtat·
ſo enmac ir niht gelingen·
ſwie ſi behabe an mir den ſige·
ſo wiſſent dc ich tot gelige·

Deswar ſi ſol·
gedenken wol·
dc es ir niht enzeme·
ob ſi min leben
der ichs han ergeben·
an ir genade nême·
ſi mv̊ſ es iem̾ ſv́nde han·
des ſol dv́ gv̊te mich erlan·

Dú mac ſin
gewaltig min·
deſt reht ich bin ir eigen·
nv vil lange·
ſwē es ergāge·
vn̄ ir gezeigē·
des ſolt ich wol gewīnen fromē·
dú gůte dv́ hat mir benomē·

minē ſin·
der ich bin·
vndertan·
ſi rẘret mich an minen alten ban·
den mv̊s ich aber núwen·
ich hvpf ir vf der verte nach·
mich leit ir ſv̊ſſen ǒgē ſchach·

ſwar ſi wil·
doch hoͤꝛe ich vil·
vō frúnden vn̄ vō mâgen·
warvmbe ich ſchine
in dirre pine·
es enmac mich niht betrâgē·
die wile ich weis in ir gewalt·
mines h̾zen troſt ſo manicvalt·

der ich pflag·
mengen tag·
wie ſolde ich ſi v̾laſſen·
er irret ſich·
ſwer iemer mich·
darvmbe wil v̾wâſſen·
er ſchiede e· mvſel ī den rin·
e er vō ir dc herze min·

gar enbv́nde·
es iſt in ſv́nde·
die mir niht gelǒbent·
der ǒgen blic·
mich vil dic
miner ſinne rǒbent·
die fúrhte ich als den donrſlag·
dem ich entwenken niene mag·

ob ich die ſchoͤnē mac geſehen·
in eime iare·
ſo enkan mir gv̊tes niht geſchehē·
voꝛ valſcher lúte vâre·
die nement des war·
Ob mir iht liebes wider var·

Es iſt ein wunder dc ich trage·
ſo kvmberliche ſwere·
alſe dike ſo ſi miner klage·
mit genedeklichē mere·
antwúrte git·
ſo froͤit den toꝛen zaller zit·
mit gv̊tē ſitten·
ich wil ſi aber vn̄ iemer bitten·

Frowe habe genade min·
dc zimt wol diner guͤte·
la mich ir iemer einer ſin·
der diner eren huͤte·
Als ich ie tet·
vn̄ das ich niemer fůs getret·
vſ dime lobe·
ich gelig es vnder oder obe·

Si endarf niht merken dc ich ſtrebe·
nach mines leides ende·
ich mv̊s es tv̊n die wile ich lebe·
han ich es miſſewende·
des enmac ich niet·
min h̾ze nie von ir geſchiet·
noch niemer wil·
es gelte lútzel oder vil·

Niemā darf des wund̾ nemen·
dc ſi mich hat gebundē·
ich enmac ir kreften niht geſtemē·
ſo iſt ſi obe ſo bin ich vnder·
ſwc ich nv tv̊n·
ſi hat beiaget an mir den růn·
ich mv̊s ir iehen·
nv wol eht doch· es iſt noch· ie beſchehen·

Alexander der betwanc·
dv́ lant vō groſſer krefte·
doch mvͤſte er ſvnder ſinen danc·
der mīne meiſterſchefte·
ſin vndertan·
vmb eine frǒwē wolgetan·
die er erkos·
er enwart ǒch niême ſigelos·

Jn einē wilden walde er ſach·
ſines h̾zen kúniginne·
des mvͤſe er lidē vngemach·
er hete ſīne ſinne·
vil nach v́loꝛn·
dc ich die ſchonē han erkoꝛn·
ze mime leben·
des wirt mir lihte ein lon gegeben·

Nv wil ich aber bittē·
die gv̊tē als ich kan·
dú mir mit ſchonē ſitten·
vn̄ mir mit zúhtē an gewan·
Vō erſt dc h̾ze min·
dc ſi ſich bedenkē noch·
vn̄ rehter dinge pflege·
vn̄ minen dienſt doch·
nach gv̊tem willē wege·
vn̄ mich ir lâſſe ſin·

gereit vnz ich nv lebe·
dan ich niemer ſwie es erge·
dag vō ir geſtrebe·
vn̄ dc iemer me·
mine not vn̄ dise pin·
den ich nv lange dol·
mit zúhten ſchone trage·
deſwar ioch tůt ſi wol·
ſi endet mine klage·
vn̄ wirt ǒch verre ſchin·

ir gvͤte vn̄ ir mange tvgent·
der vil v̾boꝛgē wurde·
ſolde ich v̾ſliſſē mine ivgent·
vnder dirre ſw̾en bvrde·

Swēne ſi wil ich bin gereit·
ſi gebe mir ein geleit·
fúr kvmber vn̄ fúr herzeleit·
dc ich ir ere ſi bereit·

ſwar ich des landes iender kome·
mit allen minē ſinnen·
deſwaR· da wahſet an ir frome·
lat ſi michs lon gewinnen·

Jch enger niht groſſer dinge zir·
wan troſtes mime leide·
des han ich vil ſwenne ich enbir·
ir ſvͤſſer ǒgen weide·

Nv ſeht ob es ein fůge ſi·
ſw̾ mir die v̾teilde·
ich ſolte ir offte weſen bi·
wer eſ an mime heile·

Min leben wirt mvͤlich vn̄ ſûr·
ſol ich ſi lange miden·
dc floꝛis mvͤſe dvrh planſchiflur·
ſo groſſen kv̄ber liden·

dc enwas ein michel kvmber niet·
wan ſi gros vngeverte ſchiet·
als es der alte heiden riet·

Si wart vil verre vber mer geſant·
des mvͤſt er in mangú froͤmdú lant·
da er ſi in eime turne vant·

vō gv̊ten liſtē wol behůt·
da waget er leben vn̄ gůt·
des gewā er ſit vil hohen mv̊t·

Dc troͤſtet mich vn̄ tůt mir wol·
vō minem kvmb̾ den ich dol·
es geſchiht gar ſwc geſchehē ſol·

Si ſol wol wiſſen ane wan·
ſwies mir darvmbe ſol ergan·
wer ſi v̾ſendet zendian·

dar w̾e min varn vil bereit·
dc mer dc lant vn̄ búrge treit·
dc enwer mir darzv̊ niht ze bꝛeit·

als rehte als ich ſi han erkant·
ſwer mir nv leidet diſú bant·
der ſv́ndet ſich vn̄ ert den ſant·

Er kerte den rin e in den pfat·
ê ich ſi lieſſe dú mich hat·
betwungē vn̄ doch ſchone ſtat·
vō ir min herze ſwies ergat·
es dvhte mich ein miſſetat·
ob ich ſchiede alſus der von
ſi iſt miner trúwen wol gewon·
vnde weis ſi gar·
ſwar ich var·
ſo mv̊s ich dar·
nemen war·
ſwēne ich getar·
voꝛ einer ſchar·
ze nide gar·
voꝛ der ſo mv̊ſ ich denken bar·
vn̄ hůtē mich doch alle tage·
vil ſere voꝛ ir zvngē ſlage·
vn̄ voꝛ ir vnrekante ſpehe·
doch wil ich dc ſi ſehe· wc mir geſchehe·
vn̄ wil dienē vf ir has·
wolde ſi noch gelǒben bas·

dc ich vō ir niene wil·
dc were mir ein ſenfteſ ſpil·
mines kvmbere deſt ze vil·
wc hilfet dc ob ich es hil·
io hat ſi mineſ loneſ zil·
geſetzet an wol tvſent iar·
ich mv̊s v̾derben dc iſt war
min arbeit·
mich niht fúr treit·
mir iſt v̾ſeit·
darnach ich ſtreit·
min h̾zeleit·
dc iſt ze bꝛeit·
dc ich e· leit·
min lon der iſt noch vnbereit·
Jch wene wol mir ſi ze gach·
ſi giht alrerſt wan ſi dernach·
vn̄ v̾ſaget mir in ſpotes wis·
deſwar des hat ſi kleinē pꝛis·
dc ſi mir git ze lone ſpot·
ſi mv̊s es iemer fúrhtē got·

Swc ſi mir tůt·
daſt alles gv̊t·
ich enmag ir niht entwenken·
Als es mir ſtat·
doch ſwies ergat·
ſo ſolte ſi gedenken·
dc es gvͤte niene zimt·
dc ſi mir gewerb vn̄ fuoge nimt·

Si ſpꝛichet dike·
dc ich erſchꝛike·
froͤmdú woꝛt vō ſchimpfe·
ſi tůt v̾dꝛert·
ſwes ſi gert·
voꝛ den lúten mit gelimpfe·
ich enmac mich ſchiere niht entſtan·
wan ich der ſinne niene han·

bi mir gar·
ſwar ich var·
ſo mv̊s ich in ir laſſen·
des wirt wolt ſchī·
ſwēne ich den min
ē moꝛgen an den ſtrâſen·
den lúten búte gegen der naht·
ich ziere die zit gar vngewaht·

Es iſt niht wunder·
dc ich ſvnder·
minen danc ſi mide·
der ǒgen ſchin·
den kvmber min·
den ich nv lange lîde·
mit einem blike tůt v̾ſelt·
ich han mir ſi vil rehte erwelt·

Jr vert mit
der frǒwē ſit·
de la roſchi biſus·
die geſach nieman·
er ſchiede dan·
vꝛo riche vn̄ wîſe·
Jch wene wol ir ſi alſam·
wer moͤhte ir danne weſen grā·

Jch wil iv minē willen ſagen·
mac ich der gv̊ten mīne·
mit mime dienſte niht beiagen·
dc ich niemer die ſinne·
noch minen lib·
bekere· an dc kein ander wib·
ſwie ich mich erhol
der gedinge tv̊t mir alſo wol·

dc ich wol weis dc ſi mir gan·
ze diene vmb ir hvlde·
gewūne ich niht mere dꝛan·
ich wil ſi der ſchulde·
niht en gehaben·
ſwer mir ze rehte ſolde ſtaben
des einē eit·
ich ſwuͤre wol es w̾e ir leit·

Sit ich der ſelde niene habe·
dc ſi mir ſanfte lône·
ich enwil doch niht weſen abe·
ich w̾de erbundē ſchone·
als ichs ger·
ich mv̊s iem̾ weſen der·
der vmbe ir heil·
ir treit ein ſchones lebē veil·

Turnus der wart ſanſte erloſt·
Vō kvmberlichem pine·
dc was ſineſ h̾zen ſvnder troſt·
dc er lag dvr lavine·
ſo ſchone tot·
der endet ſchiere ſine not·
in eime tage·
die ich nv mange iar trage·

Jch weiſ wol ſoltes ſin·
an dem gelúke min·
ir gvͤte dú iſt ſo manicvalt·
ſi tete mich noh froͤiden balt·
ich enwas niht ſelden los·
do ich ſi mir erkos·
in diſem vſerkoꝛnē don·
vf gůten riche ſchonē lon·

Jedoch ſwie es mir erge·
ſo mv̊s ſi iem̾me·
nach gote ſin min anebet·
wan ſi niht wan got getet·
Jch ergibe mich vn̄ enbar·
an ir genade gar·
dc ſi mir darnach ich ſtrebe·
ein wunnekliches ende gebe·