Wunne wil vnwunne schoͤne verdringen

Wunne wil vnwunne schoͤne verdringen·
des mans hoͤrt vnd sicht wol swers nimt war·
secht ob das· mug manig herze froͤiden wern·
est wunnenklich zehoͤrn· der voglin singen
so ist wunnenklich zesehen mang schoͤn var·
vns wil sumer froͤide vnd wunne bern·
des sint alle fro
wan die tulden senden pin·
dien stêtz so
dams in nicht mag gemůten· ich glǒb in bi mir· wan mich lat sin·
ǒch in sender not das frowe min·

Vnrechte minner irrent recht minnere·
einer machet das vieren missetrúwet wirt·
der nicht heln kan ald aber heln nicht wil·
des das sînr frowen eren dan wirt swere·
vnd aber es im ere danne birt·
des erwindet lieber minne vil·
doch solte es nit
engelten ein getrúwer man·
der gerne sicht
das sin minnen si tǒgen vnd er das vil wol geuuͤgen kan·
an den mag sich wol ein gůt wib lan·

Dv́ leide hůte irret recht minner sere·
vnd ǒch der verwâssen merker spehen·
si froͤmdent ir frowen in mangú zit·
dien ǒch dan ir frowen sint zehere·
die mugen ǒch dc vúr ein irren iehen·
dist alles wider der minner heile ein strit·
swie vil keinen·
das irret so irz mich noch me·
ich han kleinen
glúkes ze minr schonen frowen· si schúhet mich sams si gegen mir giue·
mir wart ir nie nicht wan ach vnd we·